郭可盈第二年替護膚品佰草集任代言人，日前拍攝最新硬照廣告時大談其護膚心得，稱保持皮膚清潔之外，保濕亦是重要的一環，否則就如生果放在雪櫃會皺皮。拍攝時郭可盈經常抱住一隻黃色鴨仔暖水袋，原來她是超級怕凍的人。
郭可盈日前拍攝佰草集的護膚品廣告，這是她第二年任此品牌的代言人，郭可盈收七位數字酬勞，十分滿意。
郭可盈昨日接受記者電話訪問時說：「呢隻牌子喺內地好有名堂，𠵱家想進軍香港巿場，我最鍾意用保濕晚霜，好滋潤，尤其拍劇成日入廠，我嘅比喻係一個生果放咗入雪櫃，想唔皺皮都難，所以保濕好緊要。我嘅護膚心得係落妝好重要，保持皮膚清潔，一個星期做一至兩次去死皮。」
日前拍廣告時郭可盈抱着一隻黃色鴨仔，原來該鴨仔是暖水袋，郭可盈昨日說：「我係好怕凍嘅人，拍攝現場冷氣凍，而我又着得好少衫，所以帶埋隻鴨仔暖水袋去，平時入廠我唔會帶隻鴨仔，驚整污糟，淨係帶個內膽。」
郭可盈現時正拍攝的電視劇《俗世情真》，需與一大班小朋友做對手戲，相處時間長了，她對小朋友亦大大改觀。
郭可盈說：「我以前對小朋友冇耐性，雖然唔會特別唔鍾意，但又唔會好鍾意，初時諗住同成班小朋友拍戲會好辛苦，但相處耐咗，大家熟咗，佢哋有時會同媽咪講，拍完之後咪見唔到郭可盈姐姐咯，我聽到好開心。𠵱家有時會同佢哋通電話，拍完劇都諗住約佢哋出嚟飲吓茶見面。」
採訪：魯萍、張止寒
