特區文武百官噚日總動員上街做清潔騷，其中財爺阿松最搶鏡，佢着住一對新簇簇嘅皮鞋揸把大掃把，作狀做吓樣影吓相，對住鏡頭講多過做，話咁快就完成任務。跟住重唔見埋蹤影，原來，阿松趕住下一個任務，就係陪老婆大人去睇戲。
八方噚日傍晚收到線人報料，話下晝六點左右目睹阿松同埋松嫂伏明霞出現喺金鐘UA門口，當時戲院咁啱散場，阿松同戴住個口罩嘅松嫂手拉手跟住大班觀眾一齊出嚟，同行重有兩個年長男女，唔知係親戚定朋友。
阿松夫婦究竟睇乜戲？據查，當時咁啱散場嗰套片係發哥主演嘅新片《刀槍不入一僧侶》。唔通最近因偷步買車事件搞到焦頭爛額嘅阿松，想向發哥偷橋，學吓點樣練得刀槍不入？
傳真︰2623-9278
電郵︰