雖然今日係復活節又撞啱係星期日，不過足球賽事（特別係有開盤嘅賽事），就似乎比一般嘅星期日少；當然啦，因為英格蘭嘅賽事喺復活節期間，都會開快車，喺上星期六打完之後，星期一又會再打，所以咪變咗星期日少咗唔少賽事囉！
係人都知鬼佬好重視復活節，於是呢一日亦冇乜波打，得番七場西甲聯同兩場德甲聯，以及一啲戲碼弱啲賽事。但係到咗禮拜一，英格蘭波又開番晒，重足足有成十九場波咁多㖭，所以各位球迷可以趁今日唞番吓，等到禮拜一先再搏殺。
咪話我求大俠唔提醒大家，英格蘭球隊要喺三日踢兩場波，唔係支支頂得住，特別對一啲老嘢多同後備力量唔夠嘅球隊就更加係一次大考驗，所以球迷落注前要諗清諗楚，咪見名牌就捧。
若然閣下想睇最專業同最準確嘅英超同英甲賽事嘅賽前分析，記得聽日留意我哋蘋果體育版嘞！
世事無絕對，好心未必有好報，事緣查斯坦喺上個禮拜一場慈善賽整親大腿，要唞成個月，搞到拉科高層牙痛咁聲。拉科今屆聯賽喺查斯坦助陣之下，贏出率有成六十三個巴仙，比冇佢之下多咗成九個巴仙。就係因為呢個原因，本報名家吾中呢期亦力撐拉科對家西維爾！
波友最近應該喺維爾瓦身上贏唔少，點解呢支尾二球隊近況咁弗，過去七場聯賽四勝三和，之唔係佢哋龍門A盧基打得醒囉。A盧基今屆打咗二十場聯賽，之前十一場失咗二十球，但近七場失四球，幫球隊攞唔少分。維爾瓦喺禮拜日會作客桑坦德，不妨追多一次。
換轉喺以前，如果史特加作客，通常唔會有太多球迷隨隊打氣，不過，因為佢哋今屆打得好（喺聯賽榜排第二位），所以喺禮拜日作客波琴，有成千五個球迷到場吶喊助威。為咗唔令支持者失望而回，我求大俠相信史特加班球員會搏晒老命比賽，所以就算要讓波都支持到底。
利華古遜近排成績好差，佢哋教練賀斯達早前想辭職，不過冇俾會方接受。有人話班球員對賀斯達失信心，但事情原來唔係咁，班主將好似羅美路、紐維利同史奈達都撐佢，重話成績差根本唔關佢事。佢哋咁上下一心，唔怪得青蛙仔都撐佢哋啦！
聽聞NBA嘅帝王班主菲爾馬洛夫近期春風滿面，搭上咗樂壇小天后BritneySpears，重有人向傳媒爆料話見到佢哋兩個喺賭城拉斯維加斯食燭光晚餐㖭。呢段緋聞令我求大俠想起上年帝王隊嘅主力韋伯被踢爆同名模賓絲拍拖，咁蹺帝王喺季後賽輸波，𠵱家季後賽又啱啱開鑼，唔知馬洛夫會唔會掛住拍拖唔理球會嘅死活呢？