呢排非典型肺炎搞到人人都心慌慌，李彩樺（Rain）就一早做足準備，戴晒口罩先去街。不過貪靚嘅阿Rain覺得平時戴嘅口罩好單調，所以就匿喺屋企自製別致嘅布口罩。
平時阿Rain都好鍾意DＩY首飾，佢覺得咁樣嘅製成品獨一無二，又唔會同人撞。阿Rain嘅手工都唔錯，佢話：「我嘅自製口罩係用屋企嘅碎布整，都算廢物利用，我整呢啲口罩只係將兩邊嘅布邊摺叠再加條橡筋，又簡單又平。」
阿Rain整咗好多唔同款嘅口罩，有個重用絲巾嚟整，戴起成個中東女郎咁款，不過阿Rain話戴口罩時會加個手術口罩打底，以策安全。
問阿Rain呢啲愛心口罩會唔會送畀緋聞男友方力申同蕭正楠，佢話：「啱咪送畀佢哋，不過我呢排都冇撞見過佢哋。」
韓君婷減肥成功後，多咗好多工作，但最近有報道圖文並茂話佢肥番，籮霸隨時再現江湖。噚日韓君婷返將軍澳廣播城拍劇，問佢係唔係肥番，又變番籮霸，佢就即刻擺個S形甫士話：「你哋話呢？」之後韓君婷又話：「我都有睇個報道，佢講得好玄。最重要係我同瘦身公司未完約，佢又話我約滿，咁先至好笑。」
Boy'z噚日去紅磡嘅漁人碼頭同一班歌迷慶祝復活節，玩遊戲之餘，重唱咗隻新歌，內容係講述暗戀嘅。問兩個大細路有冇試過暗戀人，Kenny（右）就搶住話：「梗係有，好細個已經玩暗戀，最好玩係對方唔知嘛！第一次暗戀係四年班，暗戀一個女風紀，重成日幻想同佢拍拖行街街。」Steven就話：「我六年級暗戀個同學，佢送咗本簿畀我，我𠵱家重keep住。」
早前有傳徐若瑄同台灣組合F4嘅吳建豪拍拖同遊日本，有台灣傳媒噚日報道話有人前日晏晝喺東京車站見到佢哋一齊，重飲埋同一盒飲品。經傳媒追查下，發現吳建豪結束台灣宣傳後，同家姐飛返美國途中，喺日本轉機順便玩幾日，而徐若瑄接受電話訪問時就話同吳建豪只係朋友，佢盡地主之誼接待一吓好正常喎。
馮寶寶噚日喺淺水灣拍攝《萬家燈火》抗炎版，配合六台三十六小時聯播嘅《心連心．全城抗炎大行動》。寶寶噚日拍攝時大講不文嘢，將「口罩」講成「Lin罩」，即時引到其他演員大笑，不過寶寶表示原來係專登講錯，寶寶重話：「我哋成日都咁玩，唔講吓笑啲日子好難過。」
