雖然Christy有一個四歲大的女兒要照顧，但她坦言對金錢並不過份熱衷，Christy說：「你信唔信都好，咁多年嚟我無論對工作或愛情，我都係為理想去做，唔係以金錢掛帥，如果係嘅話，我唔會放棄咁多公子哥兒嘅追求，幾年前咁衝動下嫁屋企唔係好有錢嘅男仔（GlennRoss）。」
Christy續說：「我只會追求真愛，對方有冇錢對我嚟講一啲都唔重要，我唔係一個要追求豪華生活嘅人，平日我自己用錢，其實都好慳，所以我過活唔需要太多錢，做人最緊要活得真同精采就足夠。」
為了增加自己的戰鬥本錢，Christy除了努力學習廣東話外，又請了老師教她普通話，Christy說：「最近我個女讀幼稚園，我見佢學寫中國字，好似人、大同小呢啲字，我反正唔識寫中文字，𠵱家咪同佢一齊學囉！不過平時同個女就用英文同普通話溝通，我想個女識多啲中文，唔會太細個就俾佢返加拿大讀書。」
Christy雖然在加拿大土生土長，回港時連一句廣東話亦不會說，所以外間一直視她為ABC，但她卻自認是個新現代中國女性，是百分百的中國人。
Christy說：「其實我都幾中國化，新年會去拜神同求籤，好多中國傳統嘅習俗，我都會做足。我唔想人哋以為我係鬼妹，好似個女出世之後，我覺得個女腳頭幾好，當好多人以為我結婚生女後，喺娛樂圈肯定會玩完，結果我一樣有好多戲同廣告拍，喺娛樂圈發展仍然唔錯，證明個女都幾利我，所以我𠵱家都算係有女萬事足。」