喺我求大俠眼中，祖雲達斯永遠都係意甲一哥。唔使講其他，淨係睇佢哋培訓新人之道就值得各班霸學習。好似祖記總監莫治前日證實來季會由佩魯賈回收新星米高利同埋巴拉斯，來季真係唔使愁無兵用，又使咩下下好似啲歐洲班霸咁，用重金禮聘招兵。
近年祖記好興將啲優質年輕球員外借到弱勢球會，借人地方幫啲後生仔成長。呢啲球隊未來棟樑遍布全意甲（重有摩德納嘅施古利、烏甸尼斯嘅辛基、帕爾馬嘅比基等），表現一對辦就回收，呢招真高明。
佩魯賈下季無咗米高利同埋巴拉斯，實力當然大打折扣，不過佢哋近年幾乎年年賣主力（如中田英壽、列柏錫、馬達拉斯），一樣保持中游位置。只要聰明教練哥斯美一日在任，都唔使為呢支神奇球隊擔心。
曼聯同阿仙奴爭標鬥入最後直路，按賽制，如果兩隊波最後同分、得失球差兼入球數相同，就踢聯賽冠軍附加賽。外國賭波公司當然唔會錯過呢個機會，列出個二百五十一倍賠率。對某啲波友嚟講，不失為刀仔鋸大樹嘅好機會，但如果你問我求大俠，就覺得渺茫啲嘞。
咪以為活基治由列斯轉投紐卡素後會生性，最近佢被指響一間酒吧度拳打一個米杜士堡球迷，啱啱至接受完問話。據知情人士講，其實個球迷只係同佢開吓玩笑，話佢唔應該去紐記，應該加盟米記。後生仔周不時惹事真係要不得，領隊卜比笠臣又要做吓嘢喇。
維拉龍門安高文今季屢次犯大錯，雖然近排有番啲起色，但據講維拉躉成日都響比賽期間噓佢。領隊泰萊近日就出言維護安高文，話會繼續重用同埋畀時間佢。我求大俠一聽就覺得好笑，莫講話安高文真係唔夠班，泰萊教極隊波都戰績唔好，顧掂自己好過啦。
一如所料，今季成為NBA歷來輸波最多嘅速龍教練韋健士噚日終於烏紗不保，不過速龍總算畀面呢位同時喺NBA史上贏得最多嘅教頭，並無公開炒佢，只係話大家達成共識決定分道揚鑣。其實速龍今季主要係傷兵所累，班球員亦有責任，唔可以怪晒韋健士。以韋健士來頭應該唔憂冇人請，話唔定前景重好過留喺速龍㖭！
NBA季後賽聽日就開鑼，有網上博彩公司開出首圈晉級賠率，大熱門帝王熱到只得一點○六倍，湖人亦只得一點二三倍，係唯一一支排名較低而又較熱嘅球隊，睇嚟莊家都睇死木狼首圈出局；本報名家蘋果波神就冷敲公鹿晉級，重有三點四倍分頭㖭，信乎？