老董唔知係咪見到中央咁高度重視打SARS，所以噚日行出嚟認衰。
唉，佢老哥今日先肯面對現實，你話特區係咪可悲呢。八方呢輪晚晚都睇中央台新聞聯播，見到佢哋又做街訪，又訪問專家睇法，就知大件事，到胡錦濤親自南下深圳，召見香港特首，又再去廣東重災區發表講話，中央台連佢「好揪心」嘅原話都有剪出街，實屬罕見。
冇耐，胡主席已經班師回朝，重開埋政治局常委會議，將打沙士定調為「關係到中國改革發展穩定的大局」嘅大事，各地要如實報道疫情，不得緩報瞞報，又話要將人命安全放喺第一位，黨政主要領導要親自抓，負總責，重要沉着同果斷應付。
胡主席講得咁斬釘截鐵，老董咪即刻出嚟認錯囉。唔怪得有知情人士話，胡錦濤點會鬧老董吖，佢已經驚到騰騰震，唔嚇得喎。
傳真︰2623-9278
電郵︰