鍾麗緹數年前因一時衝動，甘願為拍拖僅一個月的外籍男友當未婚媽媽，雖然二人在女兒出生後正式結婚，但此段婚姻僅維持了一年多便離婚收場。如今鍾麗緹雖已覓得第二春，可是經歷過婚姻失敗的她，卻對結婚深存恐懼，故拒絕了男友的求婚。
在加拿大土生土長的鍾麗緹（Christy），十年前來港發展，在演藝事業正發展得如日方中之際，相信很多人都想像不到她這個新一代性感偶像會為了愛情，甘冒星途盡毀之險，為相識僅一個月的比利時男友GlennRoss未婚生子。
雖然Christy返加拿大產下女兒後，未幾即與男友註冊結婚，不用再掛着未婚媽媽之名，可惜此段婚姻只維持了一年多，二人終於因了解而和平分手。在感情路上經歷過挫折的她，近日面對來自北京的現任男友阿John求婚，亦不敢貿然答允。
坐在香港公園內的泰國餐廳，Christy一談到男友近日向她求婚的事時，喜悅之情溢於言表，她說：「上次婚姻失敗，我檢討過係因為同前夫只係識咗一個月就決定結婚，其實係好唔理智，所以今次阿John同我求婚，自己覺得有必要再考慮，其實我同佢都拍拖兩年，好多時都會一齊生活，所以現時除咗欠缺一紙婚書外，基本上我同佢嘅關係，同兩夫妻冇乜分別，我唔介意名份。」
Christy兩年前與丈夫離婚後，便與女兒相依為命，當時在她生命中，沒有任何人和事比她的女兒更重要，所以當她邂逅阿John後，一度擔心女兒無法接受其新男友。
Christy喜孜孜地說：「我識阿John時，個女好彩只得兩歲，好快趣佢就同阿John相處得好好，不過我同前夫離婚時，個女成日問點解爹哋唔同我哋一齊住，等佢大啲我要慢慢同佢解釋。」
Christy續說：「我唔想因為自己嘅婚姻失敗，影響到個女冇父愛，所以我同前夫阿Glenn一直保持住好好關係，𠵱家佢喺澳門一間酒店做嘢，又識咗新女朋友，我都好替佢開心，佢對個女重好關心，基本上每個禮拜會抽時間見個女，而我只要得閒亦會同佢哋兩父女一齊見面，等個女可以仍然感受到父愛同母愛。」
數月前Christy前夫的父母來港旅遊，Christy還安排他們一起住在其愉景灣寓所，對前夫的雙親可謂照顧有加，她解釋說：「可能我喺加拿大長大嘅關係，唔會介意同前夫有關係嘅人做朋友，記得有次我前夫帶埋女朋友入愉景灣探佢爹哋同媽咪，嗰晚我重叫埋佢兩個喺我屋企過夜，佢女朋友可能因為係中國人，所以開頭都會覺得好奇怪，但慢慢就見怪不怪，而阿John亦從未介意我同前夫保持咁緊密關係，𠵱家阿John會有好多時間喺北京做嘢，不過無論我同佢喺世界邊一個角落都好，總之我哋有默契，每隔兩個星期就要見一見，𠵱家佢喺北京我都好掛住佢。」
撰文：陳月媚
攝影：林德雄
協力：陳偉權
服裝提供：ShanghaiTang
髮型：KEN-QIbyHermanLaw
化妝：RickChin
場地提供：香港公園L16摩登泰國餐廳
