美國饒舌天王Eminem，早排喺銀幕處男作《8里公路》入面有唔錯嘅表現，唔少美國電影公司都對佢有興趣，重想搵佢重拍六三年經典歌舞片《ByeByeBirdie》。
我羅拉收到風，話Eminem好有興趣演出呢部青春搞笑歌舞片，如果事成嘅話，佢就會喺戲入面扮演由搖滾巨星走去從軍嘅男主角ConradBirdie，都咪話唔盞鬼。
講開風頭躉Eminem，呢排佢除咗掛住力捧新人50Cent之外，最近重同師傅Dr.Dre、有份唱《情陷紅磨坊》主題曲嘅性感女歌手Lil’Kim，以及好有份量嘅MissyElliott一齊獲VH1選為史上五十大HipHop藝人，而排喺第一位嘅，正係早排其中一個成員DJJamMasterJay遭槍殺身亡嘅Run-DMC。
雖然Run-DMC成員McDaniels好自豪咁話，佢哋咁多年做嘅嘢正正代表住HipHop文化，但佢覺得其他上榜嘅音樂人只係純粹娛樂大眾，唔似得第二位嘅PublicEnemy咁有政治影響力，所以佢個人認為PublicEnemy先應該係第一。