問全屋最難清潔的地方，十個有九個都會話廚房，除了砂煲罌罉特別多之外，日日洗菜洗碗的洗碗盆，經常積水容易滋生細菌；抽油煙機堆滿油污，難洗的窿罅位又特別多，睇見都頭暈；再加埋一個煮食爐，污垢鏟極都鏟唔甩，絕對惡搞。不過若然懂得針對污垢對症下藥的話，你會發覺惡搞程度將會大大降低，就睇吓專家嘅醒目貼士！
記者：陳嘉兒 攝影：黃子偉
ImageBoy&Girl：Gary、Samantha（fromSunSpot）
梘水去污迹
不銹鋼洗碗盆經常積滿水唔理，水中所含的氯和鐵份好容易會變成水斑，積水又易滋生細菌，所以要養成每次洗完碗後即抹擦乾淨的習慣，有污迹時可用海綿蘸上去污液擦拭，擦不掉時可用浸上梘水的金屬清潔網擦，擦完用布抹乾就得。
牙膏抹水龍頭
好多人都會忽略水龍頭，其實電鍍水龍頭一樣會因積水而造成水垢，此時可以用牙膏來擦拭，擦拭後再用清水洗淨就會變得光亮，除污又不損外表。
梳打水加鹽水防淤塞
水渠淤塞會令污物倒流，唔想淤塞可用一杯梳打粉加水同一杯鹽水，同時倒入渠內，然後再倒入熱水，咁樣就可以清除藏在渠內的腐爛菜渣同污垢。
碗盆底除臭靠漂白水
一般洗碗盆下的小櫃都會擺放雜物，而且又有排水渠，密不透風好易積聚濕氣，時間一耐唔理就會變成臭氣，想除臭兼消毒，最好就係先用風扇將臭味吹走，然後用乾淨毛巾蘸上稀釋後的廚房專用漂白水抹拭，用清水再抹一次然後抹乾就搞掂，如污垢不太多又無臭味，可以就咁用清潔劑抹拭。
清潔劑加保鮮紙軟化頑迹
機身其他部份如罩及框都不能拆下清洗，怎麼辦？有個好建議給大家，就是在頑迹上噴上清潔劑，然後貼上保鮮紙，作用係要將頑強油迹軟化，再用布擦時就會輕易得多。
彩漂溝清潔液除油迹
首先將抽油煙機可拆除的部份拆下，在盆內墊上剪開的膠袋，以防弄污洗碗盆。放入三分之二盆熱水，倒入三分之二杯彩漂和兩杯廚房用清潔劑，然後將零件浸入水內（鋁質部份不能用漂白水，只可用普通清潔劑），待十五至二十分鐘後就可以用刷擦洗乾淨。
乾布捲筷子抹罅位
抽油煙機特別多窿罅位，清潔時少啲耐性都唔得，對於這些難搞位置，不妨用即棄木筷子捲上破布，然後噴上清潔劑，利用幼幼的筷子來抹細小的罅位，絕對是一個好幫手。
熱水加哥士的去油污
煮食爐最忌用去污粉，因會將爐頭抹花。想有效去油迹，可以用熱水將哥士的稀釋到1比60的濃度，然後用布蘸來抹，抹完後用乾布抹乾淨就可以去除污迹，但抹時記得戴手套以防灼傷雙手。
牙刷清理火嘴
火嘴有污垢積聚，可以先噴上清潔劑，然後用牙刷輕輕將污垢擦掉，如果擦不掉的話，就要借助螺絲批的尖頂將頑迹剔除。
火酒抹雪櫃除霉除迹
雪櫃用來存放食物，如果唔乾淨就會菌從口入，所以最好可以保持每一、兩個星期就抹一次，抹時只需要用濕毛巾蘸上洗潔精已足夠，如果出現發霉或污迹時，不妨改以火酒來抹，可以除霉除迹。
垃圾桶用漂白水浸
垃圾桶係細菌滋生的地方，所以就算清洗都唔夠，要有效殺菌就要先用清潔劑擦，洗淨後倒入一公升水同十毫升漂白水浸一段時間，用清水洗乾淨後再用就會無臭無菌。
檸檬粗鹽煲底起迹
要清潔煲底的污迹，其實一啲都唔難，只需一個檸檬和一把粗鹽就可以。將檸檬切開一半，蘸上粗鹽，往煲底用力擦，你會發現這麼簡單的材料，就可以省得煲底立立令。