四月十四日本欄寫〈醫生抑鬱〉，估唔到啲電郵立即打到嚟，一日之間收到超過十封，都係話自己家人（甚至自己）染上抑鬱症，想知道有邊個名醫可以請教。
抑鬱病呢回事，確係好難搞；名醫難求，一也；名醫收費好貴，二也；治療時間長（時間即係金錢）好長，三也；家人朋友要忍受、諒解、同情、支持，四也。所以左丁山好同情有關人等，希望佢哋能夠堅持求醫。
公開畀醫生名，做唔到。一來責任太大，二來可能違反醫生專業行規，好心畀個醫生名，分分鐘為醫生帶來麻煩，所以真係好對唔住各位讀者。唯一可以講嘅，就係〈抑鬱醫生〉嘅主角經過治療之後，恢復正常過正常，佢話畀左丁山聽：「肯醫，能夠負擔得起醫療費，以今日嘅藥物水平，一定醫得好。」
好一句「負擔得起醫療費」，吾欲語無言。睇政府醫生又點呀，當然要到公立醫院，可能要排隊好耐！香港人煙稠密，生活節奏快，工作壓力大，直情係精神心理病嘅滋生溫床，以左丁山所知，香港嘅精神科醫生數目，絕對追唔上人口需要，不過培養一位好醫生，起碼要十年時間，一時之間，冇法子達到供需平衡。寫嚟寫去都係唔敢寫醫生名，答唔到讀者，幾乎自製抑鬱，就此打住，鎖你鎖你。