中央話明支持香港特區抗炎，醫護人士可以來港，話就係咁話，香港從來唔准外地人來港行醫，內地西醫資格不獲承認，佢哋點可以直接嚟香港醫院做事呢？睇嚟都係吹吓水啫，一旦開咗先例，破壞原有機制，醫療界會搞到天翻地覆，士急馬也不可以行田！
大教授話國務院喺四月二日發出醫治「沙士」指引，方法與香港大同小異，最唔同嘅係內地以中醫藥為輔助，呢樣香港一定行唔通。一來香港醫院與西醫從來不懂中藥，冇人識得點樣落藥與管理，二來中藥出咗事，邊個負責？楊永強邊度敢孭飛。民間用中藥就得，你叫公立醫院用中藥，簡直係強人所難，毫無常識。
食中藥做預防、補身就唔同。事先食定粒中藥，唔會壞身子，亦有心理安慰，至於係唔係一定掂，慢慢先至講，將來會有研究論文出籠。既然如此，醫管局亦諗到呢招嚟實現董特首畀楊永強嘅命令——快啲降低醫護人士受感染比例。呢招就係向醫護人士提供中藥，叫中文大學中醫藥研究所（所長梁秉中教授）研製藥方，中大先知先覺，兩個幾星期前已經向藥廠落訂單將藥方內藥物煲成果粒，果粒收埋一包包咁派畀醫護人員，用滾水沖成一碗藥飲用，非常方便。今個星期三開始，「果粒中藥」出街，欲知成效如何，要看下回分解，其中一個問題係邊一個出錢？聽講中大中醫藥研究所捱義氣，醫管局冇話畀錢，仍然打自己嘅窮荷包製藥，不過窮書生銀両有限，好容易就會派晒。