政府高官的話，可以信嗎？衞生福利及食物局局長楊永強昨率領眾高官，以權威姿態解開「淘大花園爆發非典型肺炎之謎」，更拋出「煙囪效應」、「負氣壓」等一堆名詞，但對於一批深受政府政策搖擺不定之苦的淘大花園E座居民來說，謎團仍未揭曉，人心仍然惶恐。 記者：翁煜雄、黎國強、鄭豐俊
【本報訊】淘大花園爆發非典型肺炎調查報告雖已完成，但未能盡釋居民憂慮，他們仍然人心惶惶！不少居民質疑污水渠能否散播病毒，「全港水渠都係咁啦！淨係我哋有事？」部份則批評當局建議住戶經常沖洗廁所地台不切實際，「日日沖咪成屋濕晒？不如叫楊永強嚟幫我沖啦！」部份租戶紛紛遷出，有業主則慨歎仍需夜夜與「病毒」同眠。
非典型肺炎仍然肆虐，雖然昨日天氣放晴，但淘大花園昨日似乎仍「陰霾密布」，不少居民尤其E座街坊，昨午都結集在大廈外議論紛紛，一臉憂慮。
正趕着回家煮飯的E座居民余女士，在大廈大堂外從街坊口中得悉報告結果後，便唉聲歎氣地說：「我今日先知原來淘大花園條水渠咁特別！全港水渠設計都係咁，淨係我哋嗰條先識傳播病毒嘅！不過佢哋係專家，話乜咪乜囉！」被問及會否因報告而減去心中憂慮時，她拿起手中的膠袋道：「你睇吓，成袋都係口罩！我話我哋擔唔擔心吖？」
余女士又慨歎近日飽受歧視：「我哋好似俾人跟蹤咁，我老公去到邊度做嘢，都有人打電話去報館話嗰度有帶菌者！」她與丈夫辛苦工作多年才能置業安居：「淘大本來好好住㗎，落雨去街買餸都唔使淋雨！𠵱家？唉！」她坦言不敢奢望政府能控制疫情，只好望天打卦：「希望夏天啲太陽可以殺菌啦！」說畢一臉無奈地走進大廈內。
該座七樓居民的曾先生亦質疑污水渠是散播病毒「元兇」的說法，更批評當局建議經常清洗廁所地台是不切實際：「係人都知地台去水位好難去水㗎，沖啲水落去，會流出個廳，搞到成屋濕晒！」記者發現部份單位已空置，曾先生的鄰居亦已遷出，他亦坦言不敢邀親友來訪：「點知人哋鍾唔鍾意！」
調查報告指E座四樓污水渠排氣管爆裂，獨居於該處五年的劉先生說該喉管已修好，並坦言自己無有怕：「我一直都冇事，好健康呀！」他說，未必會每日沖洗廁所地台：「記得咪洗囉！日日沖咪成屋濕晒？不如叫楊永強嚟幫我沖啦！」
商場繼續門可羅雀，大部份店舖仍關門，售賣電腦用品的黃先生說生意已大跌九成，但由於生意一直靠熟客維持，不能貿然搬走，只好「死守」苦候疫症過去，「呢度有個診所醫生，睇過好多感染咗嘅病人，佢都無事，佢話最緊要自己強身健體！」他說畢拍一拍自己心口，一臉大無畏。
不過，並非所有商戶都如此有信心，一間商舖的職員得悉記者來訪時，即時大喊：「你哋成日周圍去，唔好行咁埋呀！」
觀塘區區議員兼淘大花園居民葉興國批評報告仍遺下大堆問題，「唔知政府係咪為咗世衞可以解除旅遊限制，所以求其整個報告出嚟！」他建議當局改善全港污水渠設計：「唔係人人可以日日沖洗地台，如果去咗旅行點算？」
