盧巧音日前穿着旗袍在旺角街頭拍攝電影《六樓后座》，有市民見到她大叫靚女，盧巧音笑說嚇到手震，因為入行多年都未試過被稱呼為靚女，不過她卻嫌自己男仔頭沒有女性媚態。
電影《六樓后座》日前在旺角街頭拍攝外景，女主角盧巧音以類似電影《花樣年華》中張曼玉的旗袍裝扮，在鬧巿中化妝，吸引了不少巿民圍觀。
盧巧音表示拍攝期間被讚靚女，她說：「我初時以為非典型肺炎咁犀利，條街會冇乜人，但估唔到有咁多人，重有好多人望住我拍戲，有啲人好冇公德心，出街竟然唔戴口罩。不過我冇理啲人，自己專心投入拍戲。突然間有人向住我大叫『靚女』，嚇到我手都震埋，老實講我入咗行咁多年，都未試過有人咁嗌我。」
盧巧音雖被讚漂亮，但她自言男仔頭，沒甚女性媚態，她說：「呢套戲要着旗袍，咁當然係要表現女性嘅媚態啦，但我不嬲都冇乜女人味，所以對於我嚟講做呢個角色有啲難度，拍得幾辛苦，不過我之前拍唱片封套都試過着旗袍，𠵱家我瘦咗，着起旗袍好睇咗。」
而林嘉欣則表示拍這套電影和工作人員朝夕相處，拍完要分開的感覺頗失落，她說：「我覺得好唔捨得，煞科嗰日，導演開香檳慶祝，而我都自掏腰包攞咗一千蚊出嚟，請大家食糖水萬歲。」
撰文：張止寒
