今日開始一連四日假期，係零售業嘅黃金檔期，非典型肺炎肆虐，搞到消費者冇乜心機逛街，所以商場大業主更加要搞多啲活動，以提高市民嘅消費意欲。
地鐵為咗鼓勵市民消費，旗下九龍灣德福廣場、青衣城同柴灣杏花新城，策動「全民消費為香港加油大行動」，凡消費滿五百蚊，就可以換領一百蚊現金代用券，喺翌日至五月一號期間用。三個商場每日都有一千個名額，總共有萬二個，計落就係一百二十萬。送現金代用券可以吸引消費者嚟多一次，商戶可做多一次生意。
另外，地鐵喺催谷商場生意之餘，又向最前線嘅抗炎醫護人員表達關懷同支持，準備咗五萬個「復活節心意包」，每個底價十蚊，喺旗下四個商場義賣，所得善款全部捐畀醫護人員用嚟買防護衣物。至於心意包可以作復活節禮物送畀醫護人員，以表示對佢哋嘅鼓勵。
復活節長假期開始，又係賣樓黃金檔期，除咗買樓有優惠，連睇樓客都有禮物收，當然係希望吸引多啲人睇樓。
東涌海堤灣畔呢幾日喺售樓處舉行抽獎，睇樓前填妥表格放入抽獎箱，有機會贏取五百蚊購物禮劵。
另外，華懋旗下三盤，包括馬鞍山迎濤灣、沙田碧濤花園同青龍頭傲庭峰，除咗送價值六萬元足金復活蛋予買家外，重加送電影戲票優惠券畀參觀人士，而且唔使抽獎，人人有份。華懋旗下都有幾間戲院㗎。
上海寫字樓空置率只有一成至一成半，業界估計未來幾年市道會平穩向上。基強聯行投資管理（中國）董事總經理陳基強話，𠵱家上海唔同地區嘅寫字樓，大部份由同一個行業嘅租客承租，例如陸家嘴以金融業為主；南京西路同淮海中路，係顧問行同服務業居多。呢個會係大趨勢，所以寫字樓租售市道好受單一行業嘅盛衰影響。
另外，由於寫字樓投資回報率較高，租樓同供樓差唔多，吸引部份企業考慮轉租為買，此舉既可控制成本，長遠重可以賺埋升值，因此，租轉買會係發展方向。
陳基強講，寫字樓新供應主要嚟自南京西路、陸家嘴、徐家滙、淮海路、人民廣場區域同部份城區副中心（如長寧區中山公園同浦東竹園商務區等）。
呢排非典型肺炎肆虐，不少大型集會都取消咗，成個香港死氣沉沉，中原地產都取消公司月會，但集團主席施永青發覺再咁落去都唔係辦法，所以搞咗個首季頒獎，送獎座同獎狀畀好數嘅員工同管理層，鼓勵佢哋積極跑數。
復活節假期會搞個比賽，能夠做到五宗成交，或者係佣金有二十萬或以上，嗰間分行可以得到五百蚊獎金。施老闆話分行同事再夾多些少，都可以食餐豐富嘅，亦可以推動經濟。
噚日老施派利是畀營業部各董事，裏面係老施親手寫嘅四字詞，全部有個「利」字，重係每封內容都唔同，好似「有名有利」、「金利齊來」同「紅利無窮」等。雖然冇錢落袋，但咁好意頭嘅「利字卡」，董事收到都笑到見牙唔見眼。啲董事都有送番封畀老施，係「一本萬利」。
全港市民齊心對抗非典型肺炎，六個電子傳媒今個周末會聯手搞「心連心全城抗炎大行動」，為咗表達對非典型肺炎事件嘅關注，各大小機構都肯出錢支持。長實集團主席李嘉誠早前捐咗一百萬個鮮橙畀本港醫謢人員，系內四間公司包括長實、和黃、長建同港燈，重捐出五十萬贊助呢個活動。
新地亦認捐五十萬，支持呢個抗炎活動。另外，美聯物業善美會就捐出五千蚊，開咗個員工捐款戶口，呼籲同事共襄善舉。總之就係有錢出錢，有力出力。
蘭西
電郵地址：