福山雅治遭內田有紀拋棄後，今年一月俾人爆佢狂追日劇《美女定係野獸》嘅配角白石美帆，我羅拉收到料，原來福山一開始追美帆時，佢只係稍稍出吓招，本身係福山fans嘅美帆已經投晒降，美帆重用咗好多日本大男人最鍾意嘅招數，冧到福山貼貼服服。
聽講福山同美帆交往一星期已正式成為情侶，重經常糖黐豆，佢哋拍拖鍾意去浸溫泉，差唔多一星期去一次，茨城同箱根都有佢哋嘅足迹。浸溫泉呢樣嘢其實係美帆提議，因為做過派對陪酒女郎嘅佢精通猜枚、十秒飲一杯啤酒同模仿松田聖子等人唱歌，次次浸完溫泉都令福山好鬼開心，福山就曾經同人話：「小美帆着住和服跳舞個樣，簡直冇得頂！」
聽講美帆今次好認真，由於近年嚟佢做體育節目，所以有唔少體育界人士追佢，不過全部都只係貪圖佢嘅美色。雖然福山都出名花弗，但起碼事業上都幫咗佢唔少，例如福山成功推薦佢做兩個節目嘅主持，亦可能因為咁，佢最近曾經被傳過同電視台監製有路先至上位。無論如何，美帆今次都係執到支好籤。