講到打邊爐，始終都好似係萬變不離其宗，香荽皮蛋湯底、瑞士芝士火鍋，最大不了畀埋你，都只係韓烤加邊爐火鍋嘅一爐雙食！不過近來香港「打邊爐」潮流有一種新飲食文化衝擊，用嘅係中國最傳統嘅嘢––粥，不過勝在有飯氣又啱轉季嘅時令！
記者：朱崇德
攝影：陳偉強、朱崇德
ImageGirl：Rain
用粥嚟打邊爐，對好多人嚟講好似係幾新鮮嘅事物，但唔講唔知，原來呢款粥邊爐之風，係吹自中國大陸潮汕地區。當中最過癮之處，除咗灼熟嘅餸菜有一般打邊爐咁好食，最正係煲到最後嘅粥底，集合全餐精華，簡直係甜到膩！
「一品粥」可以話係香港最早引入「粥邊爐」嘅舖頭，據負責人陳太表示：「其實潮汕等地一早已經開始有人用粥打邊爐。潮州人用佢嚟代湯底打邊爐，起初嘅諗法大概係因為想一邊熱住啲嘢食、一邊為咗滿足食粥嘅需要……用粥打邊爐重有一個好處，就係粥嘅熱度比一般湯底熱好多，再加上粥嘅米漿將肉食面包住，咁樣可以好快熟，而且可以留住肉汁，用嚟打邊爐嘅肉都會特別香甜！」
火鍋配菜的選擇，主要是海鮮及肉類，選擇不下十幾二十款，當中最熱門之選當然係豬肉、豬肝、鯇魚片、田雞、鮮牛肉、九肚魚、魚皮餃等一類食品啦！不過配菜中最具特色嘅，小記首選推介會係佢哋個古方手打魚肉餃同豬肉餃，須知佢係用木棍將佢哋打爛，以至起膠狀，然後再包餃子，所以餃子入口時特別彈口兼爽口！
大廚會採用先煎香，再回鍋燜入味的手法，所以入口特別惹味。據知好多粥客都好鍾意點呢味菜嚟伴粥，因為粥味較清，而涼瓜味較濃，一清、一濃特別食出味來，而且鯪魚肉亦同粥邊爐好夾！
一品粥
電話：旺角通菜街104號地下（先達廣場側）
地址：23923718
話明粥打邊爐係取經自潮汕菜，又點可以唔見識吓最地道嘅食法呢！如果想一試最地道嘅潮汕式食法，可以試埋九龍城呢間潮式食店，製法上最明顯唔同之處係兩者粥底，用上打冷中嘅精髓潮州粥！口感唔似廣式粥咁綿，不過一粒粒米食得出好有咬口！
呢味「潮汕粥底火鍋」配料分別有九肚魚、䱽魚、碎豬肉、蠔仔及酸菜，用嚟做粥打邊爐真係份外鮮味；至於唔食得腥嘅人亦唔使驚，因為佢哋全用鮮魚肉，入口唔會有陣腥味，再加上粥底加入了芹菜、魚露及古月粉作調味，淨係粥底已經殺晒！
食客幾句
Peggy：鍾意食魚嘅程度真係一般，但用粥嚟灼啲魚，肉身真係有蒸魚咁滑，粥底亦好甜！
雅姿娘
地址：九龍城衙前圍道92B地下
電話：23827982