兩公婆喺屋企，日日都可以緊張刺激兼大呼小叫，有乜搞？之唔係賽車！冇搞錯，將屋企變賽車場話咁易，都係多得政府呼籲大家要勤清洗屋企，結果通屋都係漂白水樽、百潔布同毛巾。一於廢物利用，變出一個模型車場，玩車仔就唔使淨係捐枱底，兼且可花上大半天時間構思及製造，比只係睇雜誌電視同打機更加充實過癮！大功告成，今日兩公婆嘅娛樂就係家居鍊車。
記者：梁佩芬
攝影：周旭文
模特兒：Angel（K-One）
鳴謝：玩具反斗城
模型車迷阿峰鍾情越野賽車，而老婆Angel就用房車同佢較量，本來不同的車要配合不同類型的場地，但阿峰就話只需考慮每個場都必要的三條件：直路、急彎及斜坡。只要有技術，兩款車都可以同場玩。就像他們，家居面積只得三百呎多一點，可以利用的只約一百呎，所以要善用空間，每一個障礙都相隔一呎左右，這樣難度相對提升不少。當然，你屋企愈大個場就愈大啦！
材料
百潔布十多塊 $6/12塊
海綿五個 $5/個
毛巾兩條 $5/條
飲管 $10/包
過期雜誌
漂白水樽兩個
膠紙
鉸剪
開始時的大直路約1至1.5米便可。在家設計車場的阿峰話：「如果地方唔夠大，做條大直路好浪費空間，通常我都會喺路上加點障礙物。而路的兩旁，我就加了兩支白膠管，可以美化車場，也可以標誌這裏就是起點的直路。」
車場最緊要有不同質地的地下，當車駛過不同材料時，車胎都要即時適應不同的阻力，你就要作出適當的變速，否則很容易「炒車」。阿峰覺得，不妨試吓用百潔布做個草地賽道，因為百潔布質地薄好貼地，越野車或私家車都可以輕易駛過，而且車場有啲顏色都靚少少。
要有越野感，就一定要有凹凸地先玩得開心，越野車因車身較高，就算一塊高約四厘米的海綿，都可橫衝直撞駛過去。相反玩房車的Angel，就好難越過此地，惟有「靠邊走」，即是用轉彎的方法，越過一塊塊海綿，所以在排列海綿的同時，也要預留一些空位，令房車也可以順利駛過。
貪靚的Angel每星期例必買近十本時裝雜誌，最好用來充當車場的上落斜位。而雜誌的高矮，要視乎車身的高度而定，越野車過的，當然可用上兩三本雜誌；房車用的，可能一本已足夠。
有直路、斜坡及急彎，差不多完成車場的大部份工程，再加上了假草地的「百潔布」，他們還覺得有點不對勁，原來差一個濕地，阿峰就堅持要一個濕地考考駕駛技術。最初他要潑一灘水在地上，Angel反而覺得搞到水花四濺，很不衞生。靈機一觸，想到用濕毛巾便可以，唔使搞到成地水，又可以有增加阻力的效果，一不小心都好容易跣胎㗎！
蠱惑的Angel，就趁阿峰不在意時，將一些飲管放在濕布下面。也有年多玩車經驗的Angel說：「勿以為越野車好容易過凹凸不平的地下，好多時一些暗彎及極輕微的上落位，都要突然減速先可以過得順利。」可憐的阿峰，因為唔知道突然加多個阻礙，無法預計速度，就像現實的賽道，往往遇到突如其來的阻力。
每個車場例必有急彎，也要有幾個普通轉彎位才像樣。Angel一番偉論：「最好用呢排剩好多嘅漂白水樽來做彎位，而且要不同大小的，因為弧度不同，難度也不同，而且，放置每個轉彎位也要先度一度闊度，以便每部車都可穿梭往來。」