從強積金成立第一天開始，香港有任何風吹草動，以行會成員田北俊為首嘅商家佬必然第一時間跳出嚟，話要停供強積金。今次SARS來勢咁洶，班老闆花款更多，連由政府代供都畀佢哋諗到。
八方問一位商家老友，點解次次都針對強積金？原來佢哋怕死，驚一停供會俾人又拉又鎖，所以周圍造勢，迫政府就範咯。
睇嚟行會真係有傾過呢單嘢，但係未有結果，因為意見分歧，畢竟講緊嘅係涉及數以百億嘅大數目，業內員工成三萬人。工會阿頭鄭耀棠都坐喺行會，有得拗吓手瓜，而基金界勢力亦不容輕侮，佢哋都寫咗信畀特首，痛陳利弊，因為一旦停供，行內員工失業事小，金融機構信心盡失就大件事。
唔知係咪知道拗都無謂，八方聽聞，快將退休嘅積金局行政總監許仕仁並冇留低任何錦囊妙計，一於繼續佢逍遙嘅歐遊行程，所謂「不在其位，不謀其政」。當年打大鱷之時，佢老哥同曾蔭權、任志剛並肩作戰，最後因天時地利贏得漂亮一仗，成為佳話。嗰陣董特首放手畀佢哋三儍去搞，但今日，老董卻滿懷自信，親自披甲上陣做救災大元帥。除咗去聽歌劇，許老爺重有乜嘢好做？
傳真︰2623-9278
電郵︰