古巨基前日去咗廣州拍步步高波鞋廣告，吸引咗好多人圍觀。𠵱家非典型肺炎咁嚴重，廣州又話係源頭，所以古巨基都幾擔心，由於個廣告要拍兩日，但佢寧願前晚返嚟香港，噚日再上過去。
古巨基話今次廣告酬勞有七位數字好理想，所以先肯冒險上去喎，而最搞笑係佢嘅髮型師，因為驚肺炎唔肯陪佢上廣州，搞到古巨基前日要戴帽拍廣告。不過步步高嘅老闆就好識做，一見古巨基，就送咗隻一卡嘅鑽石戒指畀佢定驚。
而古巨基本來帶咗乾糧上去充飢，諗住唔使出街食飯增加染病風險，但最後因為老闆請食飯，佢都係去咗。一到唔使埋位嗰陣，古巨基就即刻戴返個口罩，又要求行埋佢身邊嘅工作人員一定要戴口罩。
古巨基話因為肺炎問題，佢推咗內地三個騷，加埋嘅酬勞都超過一百萬，佢話賺錢呢啲嘢要隨緣，𠵱家工作量少咗，古巨基同朋友籌備緊暑假出一本漫畫書，投資六位數字，佢話出漫畫係自己自細嘅夢想。
記者胡比廣州直擊
陳豪噚日三十二歲生日，佢特別同四十位影迷喺灣仔一間餐廳慶祝生日，佢經理人許愿則送上一幅珍藏畫，陳豪話：「生日真係冇乜特別，今年最特別就係同咁多影迷一齊慶祝生日，噚日就同哥哥一家人食飯。」
問佢緋聞女友陳慧珊有冇送禮物畀佢，陳豪話：「冇送禮物，佢有send個SMS畀我，我哋係好朋友，最近少咗聯絡。」
何韻詩噚日去咗港台接受訪問，佢話師傅梅艷芳近排心情冇乜大波動，已經平復咗好多，阿詩重話近日出咗碟，佢特登攞咗隻畀阿梅聽，點知阿梅鬧佢封面相影得好唔正經，話佢已經大個女唔好再影埋嗰啲相喎。而阿詩又送咗隻碟畀好朋友陳文媛，點知又俾人鬧，因為碟內印咗好多朋友嘅相，但就冇陳文媛，所以阿詩應承咗話下張碟印陳文媛張相喺封面喎。
前日報道張藝謀為咗要延續英雄夢，正幫緊安樂電影公司籌拍一部古裝武俠片，重搵咗章子怡、李連杰、陳道明同劉德華一齊演出，但噚日安樂發咗聲明澄清，話張藝謀唔係拍《英雄》續集，但佢就的確係籌備緊部新戲，詳情要遲啲先公布，而安樂宣傳大員Veii喺電話度再補充講話張藝謀籌備緊嘅武俠片新戲由頭到尾都冇諗住用《英雄》續集呢個名。
宣萱啱啱喺上海拍完空氣清新機嘅廣告，噚日已經返咗嚟香港，佢話喺上海好少見當地人戴口罩，而日前有報道講話佢認為抽煙可以防肺炎，宣萱講番件事話可能係佢嘅國語講得唔好，其實佢不嬲都唔識食煙，只係聽過人哋話抽煙嘅人，患上非典型肺炎嘅機會比唔食煙嘅人少啫咁話。
陳彥行（行姐）早幾日喺節目《智在必得》度贏咗成十五萬，行姐有咁嘅機會，就真係要多謝苑瓊丹（苑仔），苑仔當日突然間唔上呢個節目，原來係發生咗件傷心事，當日佢隻狗樂樂，喺大埔俾個七十歲揸平治嘅男人車死，噚日佢喺將軍澳廣播城話：「嗰個人簡直係下流，車死我隻狗又不顧而去，我阿媽截住佢先肯落車。」苑仔講完之後就淚如雨下，佢重誓言要告個男人。
