在商業電台任職達二十六年的俞琤昨日在商台特備節目《三把火發佈會》中宣布正式離任行政總裁一職，專注在電訊盈科天馬動力的事務，其職責會交由新入主的營運總裁蔡東豪及鄭丹瑞主理。
商台昨日於十一時在雷霆八八一播出半小時的特備節目《三把火發佈會》，節目中俞琤宣布辭去商台行政總裁一職，由去年十二月入主商台的營運總裁蔡東豪及創作總裁鄭丹瑞接掌其職務，俞琤則轉而主理商台與李澤楷（小小超）的電訊盈科合資的盈科天馬動力之行政總裁職務，她亦會留任商台董事。
俞琤早於三年前已為盈科天馬動力擔任行政總裁，當時她已很少管理商台業務，故她昨日表示在商台的職稱只是沾光。俞琤說：「其實我咁多年嚟都冇參與營運工作，商台係我屋企，到咗一日我同商台再冇任何關係時，先係真正退隱。𠵱家我一啲傷感都冇，呢個只係過晒期嘅宣布，過去三年，我代表商台參與盈科天馬嘅工作，𠵱家要畀更多時間盈科天馬，我請多個人才同阿旦（鄭丹瑞）拍住上，係我咁耐以嚟最大嘅貢獻。」
商台主席何驥在節目中則說：「俞琤小姐喺商台多年嚟嘅耕耘奉獻，永不言倦。」
特備節目完畢後，俞琤在商台眾高層陪同下接受查小欣節目訪問。俞琤於前日（十六日）正日生日，查小欣問到為何選擇昨日宣布離職，俞琤說：「我睇通勝今日係大好日，Tony（蔡東豪）話準備好，我咪宣布囉。」俞琤表示今次的決定已鋪排了近九年，她說：「我已放低電台基本業務運作成七、八年，其實不停有人嚟試做，今次連名都唔要，主要做盈科天馬嘅CEO。」
俞琤謂要向商台同事說加油，至於日後有否機會重返商台，俞琤說：「我斬釘截鐵話你知唔會，因為我對新同事有信心。」她又謂：「我𠵱家最渴望係做遊俠，邊度要人幫我就去幫。」
俞琤離職，商台節目主持吳君如昨日在電話中說：「恭喜佢啦，雖然佢唔做商台CEO，但以後如果我有乜唔識，都會一樣打畀佢問佢，因為佢永遠係我心目中嘅CEO。」而另一主持葛民輝接受電話訪問時則說：「俞琤都唔係真正離開我哋，佢仍然喺我隔籬，佢依然睇住商台。」另外，DJ森美則謂俞琤離職對其影響不大，因對方永遠是他心目中的老師。
採訪：蔡如玉、胡比
