美股跌，港股跟埋，恒指回落近百點。呢頭地產商話非典型肺炎只會影響短期置業心理，嗰頭啲地產股再跌多啲畀你睇，新地（016）唔見90仙，收34.50元，低過上次低位，其他3隻大地產股，亦考驗上次低位。
非典型肺炎陰影下，睇樓人數大跌，新盤亦降價，病疫事件對樓市冇影響，好難搵人信。未來一段時間，地產股因跌得多而間中有技術性反彈，並唔出奇，但要轉勢向好，則唔容易。炒地產股Call輪免得過就免，淨係輸溢價都可以輸到面青。偶然若見地產股反彈，則不妨細細注買啲地產股Put輪做吓世界。
銀行股昨日亦麻麻，滙豐（005）跌75仙，滙豐Call輪自然冇運行，Put輪則有睇頭。9609收56仙，彈升13%，1%溢價，輪價好易跟貼正股，當然方向係同正股相反。
滙豐另1隻熱門Put輪9669則只升1.5%，收33.5仙；9669今年6月到期，溢價3.1%，槓桿率24.9倍，雖然重有兩個月壽命，但滙豐始終唔係輕易大跌嘅股份，隻輪溢價都係稍嫌高啲。
華創Call輪9643，前市2仙，昨日嘜1.5仙求賣，冇人要。隻輪6月中夠鐘，行使價8元，正股（291）𠵱家至係6.10元，隻輪好難有機會唔變廢紙。
章盛