呢個復活節假期，唔知又有幾多個SARS新症及幾多個病患者過身，希望疫情唔會惡化。噚日唔少投資者沽貨離場，等放完長假再玩過，恒指收報8579，跌96點，成交59.71億元。
位元堂（897）噚日遭拋售，股價被質至1仙「跌無可跌」水平，跌幅達61.5%，全日不斷見國中證券及寶來證券排住隊出貨，買盤則相當零星。照計近排肺炎肆虐，香港各行各業大受打擊，但中藥舖嘅生意多到做唔切，位元堂或多或少都應該受惠，冇理由會俾人咁樣質法。
ｉ師傅同阿虎講，市傳位元堂可能將股份合併，炒家驚住併股後股價跌得更加深，所以沽定貨先。佢又解釋，中藥舖近期生意係多咗，但只係多咗同客人執涼茶，並非搵真銀，參茸及燕窩等貴價藥材補品才是搵真銀生意，反而市民為咗預防肺炎，暫時不宜食用燥熱補品，所以中藥舖未必受惠於肺炎疫潮。
奧瑪仕（959）大股東裕豐國際（965）被臨時清盤人接管，噚日奧瑪仕復牌股價急挫47.7%，收報3.4仙，但成交金額只得1.5萬元。不過，裕豐被接管前，已將奧瑪仕3000萬元可換股票據出售，票據更被行使兌換成75億股奧瑪仕新股，其中一半落在獨立第三者YieldEmpire手上（相當於20%），另一半就下落不明。
裕豐持有奧瑪仕77.1億股不變，股權則由60.92%攤薄至43.36%。黑客話，似乎有人想將奧瑪仕控制權從接管人手上奪走，由於接管人好大機會將奧瑪仕股權出售，有心人當然會盡量壓價。
阿虎