曼城今季攞黃牌同埋紅牌次數唔多，暫時響英超公平競技排名榜排緊「假榜首」，好有機會靠呢度「後門」參加下屆歐洲足協盃。咦，曼城𠵱家響聯賽榜高不成低不就，唔知會唔會為保歐洲賽參賽資格，餘下每仗不計勝負，只要踢得斯文呢？
𠵱家曼城響公平競技榜排第五位，但因前面四隊，包括曼聯、紐卡素、利物浦同埋車路士已幾乎肯定踢到下屆歐洲賽，變相曼城係排緊榜首，極可能壓倒第六位嘅米杜士堡，取得下屆歐洲足協盃參賽資格，都咪話唔爽。
話晒曼城呢一、兩年使咁多錢，而隊波二十幾年未征戰歐洲賽，一定想過吓歐洲賽癮。斷估領隊奇雲基瑾無暗示，班球員都識得「守行為」啩？
拉素教練文仙尼響上個月尾話四月份係隊波爭「雙冠」嘅衝刺月，佢唔講猶自可，隊波繼歐洲足協盃瀕臨出局後、前日響意大利盃又俾蒙迪拿一腳射瓜。文仙尼響球員同領軍生涯共捧過七次意大利盃，估唔到今次連呢個幸運盃都爭唔到。唔通真係好似羅馬會長辛斯咁講，呢排啲福氣轉晒去羅馬度？
復活節假期開始嘞，我求大俠預祝各讀友響呢個假期過得開開心心，忘記最近社會各方面嘅不快。不過響波友有波睇同埋本來應該有波賭嘅日子，梳打埠大莊就以系統升級為借口唔開盤。話晒大家難得響禮拜五有機會睇英超直播波，你哋休息啫，賭徒唔會休息喎。
噚日我哋體育版至報道完AC米蘭鬧中場荒，要靠雷哥斯達獨撐。話口未完連佢都傷埋足踝，踢唔踢到下個禮拜對阿積士嘅歐冠盃都未知，但禮拜六對安玻里就唔使預佢。除咗AC米蘭之外，國米亦有簡拿華路要唞成一個月。睇見兩大聯賽勁敵增添十字兵，祖雲達斯真係飲得杯落咯。
NBA季後賽開鑼，咁多隊最難啃就莫過於湖人。由「魚腩」到季尾變成炙手可熱勁旅；搞到西岸列強手騰腳震，個個都唔想撞到湖人首圈墮馬。好似拓荒者噚日見到湖人贏埋勇士升上第五，就即刻放軟手腳輸俾快艇，寧願跌落第六同小馬打好過。可憐木狼贏咗灰熊之後雖然穩奪首圈主場之利，不過遇到湖人相信都係……