復活節前夕，小初根本無心買賣，只係留意住兩隻股票，一隻係升到你唔信嘅老虎科技（8046）；一隻係跌到冇人接嘅位元堂（897）。
老虎科技直情有猛獸風範，招股價0.30元，首日已經升到0.90元，噚日再接再厲，升多36.7%，收1.23元，已較招股價高出3.1倍。
經紀陳話，今時今日咁嘅環境，老虎科技又係創業板股，若冇人肯支持，又點上得成市？
小初明白，私人派對想升幾多都得，只不過係有啲唔明，就算要做上引入人局，都唔使炒得咁兇狠，家陣股價咁升法，又點有散戶肯接貨，真係難明幕後點諗？
至於位元堂，雖然賣藥食正𠵱家潮流，但亦難逃一劫，一開市就被洗倉，眨吓眼已跌至跌無可跌嘅1仙，之後反彈無力，全日勁跌61.5%，收1仙。
經紀陳話，位元堂發行股數多，街貨太散，市場傳出有人被斬倉，但就唔知邊個。正如一般玩笨豬跳嘅股仔，相信位元堂有排都唔使睇。
慕容小初