呂良偉太太楊小娟曾傳與章小蕙不和，前晚呂良偉和楊小娟在會展欣賞首映時，對於章小蕙已另結新歡，楊小娟明寸對方說：「𠵱家佢間舖頭日日拍烏蠅，我都想快啲有人娶佢，唔好咁煩呀。」
呂良偉太太楊小娟與章小蕙曾一度傳不和，前晚楊小娟與呂良偉前往灣仔會展出席電影《刀槍不入一僧侶》首映禮。楊小娟被問到有指章小蕙的外籍男友Wilhelm賣槍械，她即說：「我唔知佢識咗新男朋友，都係睇報紙至知咋，但啲朋友話畀我聽，佢男友係賣軍火。」未知她與章小蕙有否聯絡？楊小娟說：「間中有通吓電話，佢冇講過呢個男人（Wilhelm）喎。」
問楊小娟會否為章小蕙幫眼揀男友？她竟說：「佢得㗎啦，佢咁大對眼，使乜我幫呀，其實佢嘅求生精神好值得人學習，爭人二億五重好有鬥志面對，佢賣化妝品，又賣衫，𠵱家佢間舖頭日日拍烏蠅，我都想快啲有人娶佢，唔好咁煩呀，我都要快啲幫襯佢買衫至得。」
章小蕙昨就此在電話回應說：「佢（指楊小娟）成日都叫我快啲嫁㗎啦，係佢嘅口頭禪嚟，我覺得佢講呢番說話係善意嘅，而且我時裝店生意的確係好差，跌咗九成都有，我同小娟重係好朋友，成日都有通電話嘅。」
此外，葉璇前晚穿了一件購自日本，價值數千元的透視裝出席首映。張達明夫婦也有到場，張達明表示太太Annie任職社會福利署心理輔導科，故她亦是前線抗炎勇士的一分子，他說：「有好多淘大E座居民都搵佢做心理輔導，佢聽熱線電話都忙個不停，但我好支持佢。」
採訪：魯萍、梁錦雯
攝影：林德雄
