近排港人聞SARS色變，亞Mark想多講些正面消息畀車迷知，好等大家可以片刻間暫忘煩憂。自從英國勞斯萊斯（Rolls-Royce）同賓利（Bentley）車廠分家之後，車迷着眼點會係納入德國寶馬旗下，全新勞斯萊斯Phantom轎車。然而，另一邊廂嘅賓利亦未有放慢腳步，除早前推出全新ContinentalGT跑車外，上年響巴黎車展亮相嘅MullinerArnageLimousine，亦經已落實投產，亞Mark聽聞嚟緊今個月尾舉行嘅上海車展，廠方重會空運呢部用上一台6.75公升V8偈（馬力400匹）嘅特長豪華轎車，跟中國車迷見面。新車較一般Arnage車長伸延多728mm，令尾廂變得極之闊落外，佢重內置小型酒吧、個人電腦裝置，雪櫃及尖端劇院式AV系統；但大家咪以為佢好笨鈍，由0至100公里加速亦不過9.0秒，極速亦可達200km/h㗎！亞Mark據知呢部長車響上海車展後，亦會空運抵港跟車迷見面。至於商賈富豪有興趣知道嘅車價，估計會係一千萬上落，勝在貴得有價值嘛！若然你哋較着重人身安全的話，原來各款賓利轎車都有防彈特別版，兼且響早兩年前經已有識貨嘅香港富豪，率先引入賓利防彈車啦！