凱沙羅頓喺禮拜二宣布唔會同季尾約滿嘅中場巴士拿、後衞哈利高治同門將高治續約。前兩人年紀分別三十四同三十三歲，被放棄就係意料中事，但凱沙羅頓喺呢個階段打完齋唔要和尚，似乎蠢咗啲嘞！
冇錯，凱沙羅頓班波𠵱家嘅狀態好弗，近十場聯賽六勝四和成績上佳，不過就重未護級成功，𠵱家咁快話唔同邊啲球員續約，好影響軍心啫！重有就係，佢哋喺禮拜六作客對漢諾威有史科沙同比積利加停賽，要靠巴士拿（事後表示會去卡塔爾踢波）撐住條中場線；𠵱家巴士拿知自己都冇得留隊，你估佢同後防主力哈利高治，重會唔會同球會搏老命吖！
凱沙羅頓選擇唔同佢兩個續約，我求大俠都好理解。但係打完齋唔要和尚就過份啲！
新特蘭上周率先降班，西布朗如無意外會步後塵，而球會前主席湯臣最近見到球隊現況，就落井下石，指西布朗今季升上英超應得到近二千五百萬鎊回報，只可惜領隊美臣執教後一直先使未來錢，搞到球會無錢賺；重話唔睇好呢隊波嘅前景，會賣走手上嘅股份。我求大俠都幾同情美臣，所謂「限米煮限飯」，到𠵱家球隊都唔使包尾，重想點呀?!
巴塞隆拿為咗令上場被罰出場嘅沙維奧拿，可以喺禮拜六對皇家馬德里場聯賽上陣，就幫佢提出上訴，點知喺禮拜二被駁回。但係，巴塞重有兩次上訴機會，所以沙維奧拿重有望上陣鬥皇馬。話時話，巴塞前線得番古華特一個前鋒，如果連沙維奧拿都冇埋，攻擊力肯定大受影響，咁唔怪得佢哋咁積極上訴啦！
有傳紐卡素領隊卜比笠臣想用二十萬鎊（約二百五十萬港紙），將佢哋前鋒確特嘅細佬里昂確特，由修安聯帶返聖占士公園球場。之不過，係人都知確特自從喺○○年夏天以七百萬鎊從溫布頓過檔紐記後，就一直黑到𠵱家，養傷重多過比賽，所以咪話我求大俠唔提醒「老笠」，喺羅致里昂確特之前，真係要諗清諗楚。
早幾日前重量級拳王般奴宣布東山復出，理由係要復興目前如一潭死水嘅英國拳壇，點知噚日有二五仔爆料，話已經成四十一歲嘅般奴重出江湖，原來係要賺五百萬美元贍養費畀佢離咗婚接近兩年嘅前妻，聽聞佢首場復出比賽嘅戲金啱啱好係呢個數喎。般奴之前嘅復出理由講到咁冠冕堂皇，原來咪又係為咗錢！
逢周一至周五見報