有些事情就是無法解釋的，例如討厭毫子，尤其兩毫子和一毫子。曾經每日竭盡所能去剷除「呢啲」眼中釘（我就留意咗好耐，毫子好有聯群結黨的本質，總是一咋咋的來），但問題是，剷除毫子具相當難度。一次過用晒幾廿蚊毫子畀錢，點好意思。拎去銀行唱亦需要相當勇氣。袋一大咋出街，購物時盡量比足毫子尾數，好唔瀟灑。逃避找續等如斬腳趾避沙蟲。索性掉晒佢就一定會有報應……為毫子事上心，真苦了自己。就擲埋一二面好了。
不過我也愛過毫子。那時候是多麼的手緊，靠銀仔度日，五元、兩元、一元的倒用下去，到一個地步，「我已經窮到刮兩毫子用了……」一夜跟一位幾面之緣的男人碰上，我說。「講個秘密你知，」男人說：「我最窮的時候，莫說兩毫子，就連一毫子都無，你知我怎辦？去巴士站執人家唔覺意跌低的毫子，逐個逐個站咁執，天光行到天黑，一毫一毫的累積，換飯吃……」
就這麼一下子愛上了他。只他不愛我。愛與不愛，也都是無法解釋的。
（編按：康妮續稿未到，暫停一天。）
容雅慧