大假在前，好淡雙方算係放軟手腳，好友略勝，恒指有43點進帳。
稍為突出嘅有中電信（728），收1.42元，升4仙，下周四派成績表，唔會有乜驚喜，掛牌之時距02年底年結日只有個幾月，派成績表後大概係「與預料相符」。中電信幾隻Call輪，有啲紮紮跳，例如9696，由8.9仙彈上11.8仙，升幅達33%，做咗威水榜阿3，有8球成交，唔係乾升。
9696今年11月夠鐘，溢價11.1%，槓桿率12倍。照計11月到期，大把時間，有逾10倍嘅槓桿率，高啲溢價唔算唔合理，不過正股一向波幅唔大，彈跳力麻麻，隻輪買唔過，呢幾日由低位反彈，只屬技術性趁正股升而反彈，追唔過。中電信其他Call輪，溢價亦係好高，交投又少，亦係唔值得追捧。
其他兩件國內電訊股，升過一陣，收市冇乜變化。
中移動（941）最高15.85元，收15.70元，爬高1格；聯通（762）最高4.325元，平收4.275元。
國內電訊股短期可以睇番好少少，話晒冇乜點受沙士影響，相反可能有少少得益。聯通冇Call輪可玩，炒輪，可以諗吓中移動Call輪9773。
章盛