你我聞「感染」色變，Anka卻不介意被人感染，亦以感染他人為樂。不過，請放心，這裏感染的不是病毒，只是「快樂」。做了小丑九年的Anka，由受訓開始，已明白穿上小丑衫化了妝，就肩負起令人開心的使命：「我見到人開心自己都會開心，快樂是一種感染。」
有小丑的地方就看到笑臉、聽到笑聲，小丑代表了快樂。在Anka眼中，歡樂不用尋尋覓覓，秘方從小朋友身上輕易找到：「小朋友見個大公仔就會笑一餐，覺得好笑就大笑，唔會想太多。學一下小朋友的直接，咁就會HaveFun。
「大人就好唔同，有好多點解，你逗他笑也會諗點解，唔識得Enjoy，如果將無必要的東西想得簡單些，人也會開心一些。」
在海洋公園工作的Anka說，近年要逗香港人歡笑，倍感困難。擅長帶來歡笑的快樂使者，讓大家分享他的樂觀思想：「凡事不要只看唔好的一面，點解大家只睇有幾多人中招，又唔睇吓有多少人出院？今次香港人好團結，遇到大問題都可以克服的話，其實是賺了。邊個唔想賺？咁樣諗就開心啦！
「香港人只是唔習慣突發事情，所以唔知點處理。我表演喜劇時，有小朋友走上台一齊玩，無端端多了一個角色，我唔會停咗個劇請佢落台，反而執生睇吓佢可以點樣配合我，咁就大家開心一齊玩。我唔覺得係大問題，因為已經習慣，於是在台上處變不驚，重可以好從容。」
記者、攝影：李敬賢