施念慈同陳穎妍兩個無懼肺炎危機，照樣出街買衫扮靚。噚日馮仁昭就撞到佢哋喺銅鑼灣羅素街一間上樓嘅歐洲時裝特賣場買衫，佢兩個都手挽最新款嘅彩色LV手袋，陳穎妍行咗一陣冇收穫，而施念慈就好快手，而且好精明，專揀啲一、二折嘅衫，十幾分鐘揀咗五件，原本要五千幾蚊，不過有折，最後埋單一千九百五十蚊。其中一件白恤衫原價一千三百九十，佢只係用一百九十蚊就買到，另外有兩條流行嘅束腳四個骨褲，佢試都冇試就買咗。
施念慈同馮仁昭講：「𠵱家巿道唔好，不妨趁減價入貨。」見施念慈好似發福咗少少，佢話：「𠵱家肺炎少咗出街同多咗打牌，寫書又只係坐喺度，所以搞成咁。」而陳穎妍就話早排去咗歐洲掃貨，今次主要係陪施念慈買嘢。陳穎妍同曾志偉都係今個月十四號生日，佢話同志偉好有緣份：「之前同朋友喺陽明山莊慶祝時撞到志偉，上年慶祝生日又撞到佢。」
混血女模MaggieQ最近為一個護膚品牌擔任代言人，日前佢花咗七個鐘，分別以十個造型拍攝平面廣告，其中MaggieQ要着住一件桑拿浴袍出鏡，起初佢好擔心會太過性感，不過現場工作人員同佢講感覺健康，所以佢好放心拍攝。而MaggieQ有感皮護喺護理之後效果幾好，所以佢都向老友黃佩霞推介。
焦媛繼早前喺香港同新加坡演出舞台劇《蝴蝶春情》，大演激情床戲之後，佢今年六月又有更大膽嘅演出，焦媛今次會喺香港同新加坡演出《赤 禁室》，佢會連底褲都除埋，佢喺劇裏面飾演五個角色，包括妓女、看護、模特兒、名媛同過氣女星，每個角色每場戲都會同男主角李潤棋有親熱床戲，焦媛話係劇情需要冇得避喎。
近日因為非典型肺炎肆虐，好多演唱會都取消或延期，不過都有例外嘅。林子祥同葉蒨文兩公婆上個禮拜日就喺美國西岸舉行演唱會，佢哋噚日到達紐約，將會喺十九號同二十號喺大西洋城再唱兩場。而陳慧琳十九號會喺大西洋城登台，同林子祥夫婦打對台，陳慧琳演唱會嘅製作單位負責人孫先生話啲飛已經差唔多賣完，一定會如期舉行。
趙傳同林憶蓮喺北京舉行嘅個人演唱會，都同時決定延期，兩邊嘅主辦單位都用「不可抗拒」為理由，應該都係因為非典型肺炎。趙傳好重視今次嘅演唱會，本來佢會同細佬趙杰同台演出，重邀請咗李宗盛做嘉賓，另外重叫埋結婚六年嘅上海老婆同兩個仔一齊出席，但演唱會突然延期，連趙傳呢個大男人聽到消息都忍唔住喊咗出嚟。
