家具股中意控股（1198）舊年上市以來，除咗開頭炒過一陣外，其餘大部份時間都乏善足陳。
不過，上個月公布惠理基金以每股1.05元購入近5%股份後，股價又開始有異動。
經紀陳話，中意將於4月28日公布全年業績，可能有人想借機炒一轉都唔定。
中意上市以來，一直都係由兩間華資證券行睇住，表現唔算高調，但可能工業股當旺，兼且隻股搵到基金買入多少貨，所以近排陣容完全唔同晒。
近排隻股雖然成交只係百零二百萬元左右，但就搭晒棚，擺明想做嘢格局，而股價則一級級咁慢慢炒上。
中意噚日微升1.9%，收1.06元，與惠理基金入股價相近，如果即將公布嘅業績表現對辦，或者可以短炒一轉。
另外，早排受到更換核數師消息影響，明豐珠寶（860）股價一度急挫，但噚日公布嘅業績又幾靚，賺成4033萬元，升幅超過3成，唔知對股價表現有冇幫助呢？
慕容小初