對付「沙士」（SARS）老董雖然乜都慢幾拍，但係一話要做，前線人員都不敢怠慢。好似警隊咁，話咗要幫手抽查啲家居隔離者有冇乖乖哋留喺屋企，就保證做到。
八方聽聞，警隊一哥曾蔭培已經下令，叫嗰啲負責突擊檢查嘅同事要盡量表現得「專業同低調」，減低對病患者親人造成不便，一般嚟講，佢哋都唔會入屋，喺門口數吓人數就OK。
咁又係嘅，啲隔離者又唔係賊，唔使太大陣仗，況且香港人今次都算聽話，性命攸關，重涉及公德，唔守規矩都唔得啦。聽講第一日都有人唔見咗，後尾都出現番。
警隊有晒足夠裝備（口罩）畀啲警員，一哥雖然自己冇有怕夠吉士（guts），平時喺辦公都冇見過佢戴口罩，但係佢就同啲手下講得好清楚，如果喺高危地方做嘢，就一定要做足保護，平時就任由啲兄弟戴唔戴口罩巡更。
其實𠵱家各行各業都有機中招，警隊有十個人（包括文職及輔警）要入院治療，包括曾經去過淘大執勤嘅懷疑中招警員，當中三個已經出院。
警隊此時此刻責任重大，但暫時都冇分A、B組辦公，一哥真係無懼「沙士」。
傳真︰2623-9278
電郵︰