昨日《蘋果》大字標題問阿董做緊乜？不過，阿虎覺得阿董其實唔做好過做，唔講好過講。每次有問題，阿董都走出嚟話有信心解決，但問題往往愈搞愈大鑊。
阿董話過死於SARS多數係長期病患者或屬老弱人士，而且大部份患者可痊愈。其後即刻出現死者趨向年輕化兼無長期病患，而且死亡人數日日升。
唔通真係連個天都同阿董玩對抗？阿董今時今日在民意調查評分中重有40分以上，已十分偏高。楊森近日叫阿董唔好走出嚟講嘢，雖然比較野蠻，但亦反映阿虎與一眾豬朋狗友嘅心聲。
標普期指噚日一度勁升9點，但港股只微升43點，收報8675，成交58.86億元。其實在SARS死亡人數日日創新高下，仍未觸發新一輪拋售潮，已算港股承接力強。國泰（293）亦見反彈，上升1.7%，收報8.80元。
里昂出報告唱好國泰，話國泰在8至8.50元水平可吸納，12個月目標價11.10元。里昂重話國泰現價已反映今年蝕30億元的不利因素。
海域集團（1220）近日似有異動，兩日累積升幅8.3%，噚日收報1.30元。公司已申請將海域化工分拆主板上市，集資發展業務。但現時市況差，搵人認購新股其實幾難，若強行分拆上市，倒不如派畀海域現有股東，然後介紹上市，在得到上市地位後，等待時機再配股集資。
TCL國際（1070）噚日遭大幅拋售，股價跌5.1%，收報1.49元，成交達1億元。據聞有分析員見完管理層後，睇淡手機業務，叫芬佬沽貨。
阿虎