呢排為咗防範感染非典型肺炎，個個都要戴上口罩，其實日本搖滾歌手桑田佳祐上年舉行巡迴個唱嗰陣，已經喺後台戴住口罩周圍走，做足預防措施，可謂先知先覺！
我羅拉最近就睇咗桑田最新推出嘅《桑田佳祐LIVE!2002巡迴保存版DVD》，入面輯錄咗唔少後台絕密片段，好似桑田雖然貴為天皇巨星，就算有小小傷風感冒，佢都會依照指示，好衞生咁喺後台戴住口罩，費事傳染畀工作人員，佢咁好榜樣，連帶其他手足都戴晒口罩。
其實呢張DVD重有好多精采同過癮嘢，好似演唱會入面唔單止有性感蝙蝠女伴舞，桑田重興奮到揸咪做不文動作，搞到fans鬼咁high。
不過講到令人最感動嘅場面，就肯定係演唱會最尾一part，原來桑田愛妻原由子同SouthernAllStars嘅成員，一直坐喺休息室等出場，擔任壓軸神秘嘉賓，最後佢哋一齊上台jam歌，令到桑田感動到眼濕濕㖭！