電視頻頻有衞生署醫生，呼籲市民要保持家居衞生清潔，預防非典型肺炎。講到難清潔，一定非廚房莫屬，面對各種油迹污垢不知從何入手，今次就等清潔孖寶教你點樣清洗廚房六大藏污點！
記者：陳嘉兒 攝影：黃子偉
ImageBoy&Girl：Gary、Samantha（fromSunSpot）
逢星期一至五刊出
不銹鋼洗碗盆積滿水唔理，水中所含的氯和鐵份好容易會變成水斑，積水又易滋生細菌，所以要養成每次洗完碗後即抹擦乾淨的習慣，有污迹時可用海綿蘸上去污液擦拭，擦不掉時可用浸上皂水的金屬清潔網擦，擦完用布抹乾就得。
電鍍水龍頭一樣會因積水而造成水垢，此時可以用牙膏來擦拭，擦拭後用清水洗淨就會變得光亮，除污又不損外表，污迹擦不掉時用去污劑擦拭一樣掂。
一般洗碗盆下的小櫃都會擺放雜物，而且又有排水渠，密不透風好易積聚濕氣，時間一耐唔理就會變成臭氣，想除臭兼消毒，最好就係先用風扇將臭味吹走，然後用乾淨毛巾蘸上稀釋後的廚房專用漂白水抹拭，用清水再抹一次然後抹乾就搞掂，如污垢不太多又無臭味，可以就咁用清潔劑抹拭。
擺放餐具的廚櫃好少會積聚油污，只要平時保持乾爽，到清潔時就會變得容易，抹櫃前將所有餐具搬走，用熱水將毛巾浸濕後扭乾，加上廚房用清潔劑抹拭，最後用熱水再抹就乾淨晒。
抽油煙機油迹多又多窿罅位，清洗都大有學問。首先將可拆除的部份拆下，在盆內墊上剪開的膠袋以防弄污盆的內側，放入三分二盆熱水，倒入三分二杯彩漂和兩杯廚房用清潔劑，將零件浸入水內（鋁質部份不能用漂白水，只可用普通清潔劑），待十五至二十分鐘後就可以用刷刷洗。
機身的罩、框位唔可以拆下浸洗，可先在頑迹上噴上清潔劑，然後貼上保鮮紙，這可將頑強油迹軟化，再用布擦時就會輕易得多。
對於微細罅位，可以用即棄木筷子捲上破布，再噴上清潔劑，抹罅位就輕易得多。
煮食爐頭最忌用去污粉，想有效去油迹可以用熱水將哥士的稀釋到1比60的濃度，用布蘸來抹，抹完後用乾布抹乾淨就可以去除污迹，但抹時記得戴手套以防灼傷雙手。
火嘴有污垢積聚，可以先噴上清潔劑，然後用牙刷輕輕將污垢刷掉，如果刷不掉就要借助螺絲批的尖頂將頑迹剔除。
抹完煤氣爐，記得重有爐邊四周的瓷磚，先噴上廚房用清潔劑，即刻貼上保鮮紙，隔一陣等油迹軟化後就可以用布擦拭，再用水抹多一次就會變得乾乾淨淨。
雪櫃用來存放食物，如果唔乾淨就會菌從口入，所以最好可以保持每一、兩個星期就抹一次，抹時只需要用濕毛巾蘸上洗潔精已足夠，如果出現發霉或污迹時，不妨改以火酒來抹，可以除霉除迹。
垃圾桶係細菌滋生的地方，所以就算清洗都唔夠，要有效殺菌就要先用清潔劑擦，洗淨後倒入一公升水同十毫升漂白水浸一段時間，用清水洗乾淨後再用就會無臭無菌。
菜刀、鐵罐、鹽同豉油都係令不銹盆生銹的元兇，其實對付生銹可以用蘿蔔蘸上去污劑，在生銹位上擦拭，粗粒子就會黏在蘿蔔上，做到去銹不留痕的效果。
水渠淤塞會令污物倒流，唔想淤塞可用一杯梳打粉加水同一杯鹽水，同時倒入渠內，然後再倒入熱水，咁樣就可以清除藏在渠內的腐爛菜渣同污垢。