快將在港推出嘅萬事得M62.3，動力輸出非常強勁，皆因佢嘅動力心臟，係一台2.3公升全鋁合金嘅MZR四汽缸引擎，配合S-VT漸進式氣閥開合技術，故此馬力輸出高達178匹，而扭力亦達至21.9kgm，比其他同級對手如凌志IS系列、奧迪A4及寶馬3系有過之而無不及，並為同級之冠。另外，車子於低至中段轉速時，亦能提供極佳嘅線性加速效能，足以滿足駕駛者對引擎表現嘅要求。
MZR引擎可算係萬事得近期嘅得意之作，喺日本廣島生產嘅MZR引擎，不但採用當今最高水準嘅生產技術製造，而年產量更高達150萬台㖭！呢款引擎具備有幾項主要特色，實在值得大家留意；首先，MZR引擎用上雙凸輪軸16氣閥設計，由具有液壓張力調節嘅靜音鏈條驅動，除可減少維修嘅需求外，亦可降低引擎本身所發出嘅噪音。第二，活塞以輕合金製造，活塞裙部並以鍍鉬處理，可有助減少噪音及摩擦阻力；第三，進氣系統以耐熱膠（Thermoplastic）製造，並具有等長通路，使引擎可發出最佳聲響。最後，排氣歧管以不銹鋼管製成，佢嘅設計可降低回壓（排氣氣流嘅反壓）以增強引擎效率，並可讓轉化器迅速達到操作溫度，以減少所排放嘅廢氣。