泳衣大王德發集團（928）自從周一公布打算同裕元集團（551）簽訂期權合約，畀裕元認購不多於20%股份後，股價連續兩日抽上，幾乎收復早前失地。但對工業股有多少研究嘅經紀黃話，佢覺得今次德發急升可能係虛火，家陣無謂高追。
德發年初在0.60元樓上炒過一排，由於公司大手筆請證券界到柬埔寨睇廠，全世界都以為對股價有刺激，紛紛入定貨等炒，點知股價一浪低於一浪，重一度低見0.50元。
不過，自從公司周一公布，與現時持有4.8%的裕元傾緊期權協議後，股價就急速反彈，噚日再升9.3%，收0.59元。
經紀黃解釋，股價急升係炒家憧憬發得成期權，重希望定價愈高愈好，但睇真啲份通告，係話希望在今年10月前達成協議，家陣先至4月，重有成5個幾月咁遙遠，人哋使唔使咁早做工夫？重有，德發舊年發過一批可換股債券，據聞德發先排被質，就係因為有人行使，換股沽出所致，所以佢對於期權呢一類衍生工具，冇乜好感。
慕容小初