美軍攻陷伊軍最後一個根據點──侯賽因家鄉提克里特，基本上可以宣布侯賽因政權正式敗亡，亦意味戰事快將結束。以上利好消息配合花旗及美銀03年首季業績較市場預期佳，美股周一晚大幅回升，杜指以全日高位8351收市，升147點。
杜指周一晚大升147點後，技術指標及時轉好，重回10及20日線之上收市。美股周二晚收市指數參考作用不大，甚至可以唔使睇，因收市後3隻巨型科技股微軟、英特爾及摩托羅拉公布業績，3股業績表現對港股今日影響更為貼身。
美股大反彈，大戶趁勢提前平淡倉，恒指昨日回升98點，收8632。今日港股能否持續反彈，就要睇3隻巨型美國科技股業績好壞，除非特別利好，否則復活節假期前，恒指升破8775機會不太大。
恒指去年12月至今，形成平行下降通道走勢，現時通道頂約在9100，通道底約在8310。由3月中至今，在通道內可畫出一個三角形，降軌約在8775，升軌約在8490。短期而言，恒指若升穿8775，有機上試9100；若跌穿8490，則下試8310。
基於上述形態分析，短期可以炒上落，恒指升近50日線（現處9010）至通道頂9100水平，是伺機買入恒指Put輪的時機，突破通道頂須止蝕。
另方面，恒指跌近通道底8310水平，可買恒指Call輪博反彈，確認跌穿通道底則止蝕。估計肺炎未受到控制前，港股會沿平行下降通道反覆炒落。
趙飛雲