「重賞之下，必有勇夫」，粉嶺綠悠軒一個業主就係咁樣，先至可以喺短時間內賣出手上單位。中原地產粉嶺名都分區經理郭同章話，呢個綠悠軒1座中層G單位業主，早前向代理表示，凡帶客嚟睇樓，都可以收到一百蚊獎金，雖然唔算多錢，但所有想買三房嘅客，代理都首先帶去睇呢個盤，總共有十幾個客睇過樓，約莫十日，單位就賣出咗。另外，做成嘅中原同事就攞到業主兩個佣。有心想賣樓嘅業主，不妨用呢招。
另外，單位成交價一百四十五萬，以面積八百七十八呎計，呎價一千六百五十一，比市價略低三巴仙。
至於買家，四出睇樓兩三個禮拜，其中對呢個盤幾有意思，所以政府貸款批出，就即時落槌入市。
郭同章又透露，屋苑啱啱又出現追價成交個案，七座中層A單位，六百三十呎，原本買家只係出一百萬，點知見到有另一個客出高啲價錢，所以決定加碼七萬五，成功買到個單位。
三月下旬，美伊戰事爆發，非典型肺炎襲港，喺一連串負面消息衝擊下，利嘉閣全月嘅營業額不跌反升，有二千四百萬，重有錢賺，唔怪得董事廖偉強咁開心啦。為咗鼓勵手足，利記周一晚喺灣仔嘅東海海鮮酒家擺慶功宴，請晒所有董事同區頭食飯，因為呢班高層要不斷睇實啲前線員工，同不時畀鼓勵下屬，先至有咁嘅成績。
咁班前線員工呢？聽利記講，其實公司喺三月已經設咗好多獎項，做到目標數額嘅同事即刻有獎金落袋，再好數啲嘅，可以直升做客戶經理，重即時加底薪。咁即係前線有錢收，上司就有餐食。
近排聽到「非典型」都為之色變，長實就偏偏要講呢三個字。其實佢哋想講，泓景臺用咗「非典型設計」。長實噚日帶傳媒親身體驗吓個盤接近現樓嘅質素，建築師何顯毅就落力講解設計同建築嘅賣點。
非典型肺炎事件爆發，令唔少人買樓時留意多咗物業空氣流唔流通嘅問題，何建築師話，個盤呈弧形排列，中間有個南北開口對流設計，增強空氣流通，設計有別一般井字形一梯八伙嘅屋苑，唔會困住啲死氣。
瑞安建業負責興建青山醫院重建第二期第二階段工程，同埋東涌第二十及四十區建築項目，最近攞到環境運輸及工務局嘅「公德地盤獎」，而且係第五次攞獎。
呢個「公德地盤嘉許計劃」，喺九五年設立，係嘉許有公德心表現、注重安全，同提供健康環境嘅承建商。評審團由環境運輸及工務局代表，同有關項目嘅建築顧問組成，定期到各參賽地盤巡查，就地盤嘅整體管理、守法、安全情況同環保措施等方面作出評核。
幾時可以徹底消滅非典型肺炎病毒，無人可以預測，但由疫症爆發到𠵱家超過一個月，通街都係「幪面超人」。
不過，噚日如常外出採訪嘅蘭西，就發覺戴口罩嘅市民，並唔係好似染病人數咁一面倒急增，部份依然冇戴，而開記者會嘅地產代理員工都無戴，同疫症爆發初期個個戴口罩嘅防禦態度完全唔同。可能係事件已經拖得太耐，又或者係大家已對呢種病嘅存在感到習慣，但點都好，千祈唔好鬆懈！若果因一時疏忽而中招，咁就唔好啦。
百業蕭條，但係對班超級打工皇帝就似乎冇乜影響，今時今日重可以享受每個月十幾萬嘅房屋津貼，淨係一個月租金，已經係唔少打工仔嘅年薪。好似大潭紅山半島一間三千呎嘅臨海大屋，啱啱租咗畀個外國公司租客，月租十二萬，重未計管理費同差餉，呎租四十蚊。
美聯羅文駒話，間屋之前嘅租約都係十二萬左右，逆市個價重咁硬淨，因為業主識得落本翻新裝修，加上地段靚，質素幾乎係全屋苑最高嘅，所以可以企硬收十二萬一個月。
蘭西
電郵地址：
