老友記傳來網上流行嘅老董笑話，再傳過去畀新加坡嘅靚女賓架D，十幾日都唔見佢有反應。卒之昨日收到賓架D電郵：「去完台灣公幹，返到新加坡，奉公司命自我隔離十日，今日先至返工。」自我隔離呢招，雖然算係放假，但實在麻煩，假如公事在身嘅話，焦急非常。
外國銀行全部用呢一招，於是啲賓架覺得如非必要，一定唔嚟香港，咁就慘矣。瑞士第一波士頓每年趁七人欖球賽之便，在港台開基金經理會議，請大公司CEO推介，與基金經理、分析師一齊開會，一齊食飯，一齊睇波，好玩到極。玩完之後，基金經理自然識做，幫襯買番一啲股票，皆大歡喜。不過今年好多基金經理唔嚟，大會失色，生意亦做唔成。佢哋唔嚟香港，一怕染上沙士，二怕返到去之後，冇事都要自我隔離十日。法國里昂一年一度嘅「新興市場投資大會」，本已成為全球投資界盛事，為香港帶嚟好多bigspenders，令五星酒店、法國餐廳、蘭桂坊得益不少，𠵱家又因為SARS搞唔成。
咪以為呢啲係暫時損失，國際基金界來香港參加兩個大會，對中國投資極為有利，大會取消咗，以後呢一年佢哋對中國不信任（因遮瞞沙士）、對香港冇信心（沙士令經濟不景），佢哋點敢大手投資呀。至於對酒店餐飲業嘅影響，猶其餘事耳。想落唔止佢哋怕嚟，我哋出外亦係煩，如果我去LA，到達後要隔離七日至十日嘅話，淨係住酒店費用，都有排計，煩成咁，不如唔去，國泰又少一單生意！