唔通真係近水樓台先得「魚」？小記最近喺九龍城認識了一位兩代喺西貢從事漁業嘅朋友叫小馬，佢啱啱喺九龍城新開咗一間專營新鮮海鮮嘅日本料理，最強係大部份海產食品完全係「香港製造」，甚至係佢親身落海網、入水捉！
記者：朱崇德 攝影：陳陶鈞
逢星期一至三、五刊出
活捉、生劏兼賣！新鮮就絕對係必然啦！但成本影響價錢，要做多咁多重工夫，會唔會特別賣貴啲？答案係少咗中間人「食價」，到你枱嘅料理只會更大件、價錢更加大眾化，更難得係喺度食飯簡直有如上咗香港海產課一樣！
啲人鍾意入西貢食海鮮，皆因嗰度有一班漁家用魚排養魚兼出海捕魚，其中大老闆小馬哥，就係其中一個有魚排兼有出海漁船之人！
「其實一直都有一個心願，就係想開一間屬於自己嘅海鮮店。市道好時，呢類餐廳多數俾一啲大財團壟斷晒，到𠵱家市道唔好，反而有機會畀到我哋呢啲小本經營者，人工同舖租都平咗好多。好似九龍城呢間舖位，比我五年前問價，足足平咗三分二！相同人工就請到十幾年經驗嘅日本料理大廚！感覺真係天時地利人和！」
相對番97年，香港產量得番三成左右，不過近年由於有咗休魚期，真係有番啲改善；香港附近海域最多捉到嘅海鮮，主要有黃腳鱲、赤鱲、細鱗、鱸魚、石蚌、紅魚、懵仔等，都唔好話唔多。
「自己喺西貢榕樹澳有一個魚排，舖內新鮮海魚基本供應已經無問題，而且天氣熱之後，平均每星期我會親自出海兩、三日，出去捉一啲新鮮海魚返嚟做刺身……好多人都會『形』住香港近岸嘅魚會有一陣火水味！其實都係一種誤解，因為好多香港魚都係由公海游入嚟，味道應該無問題，不過揀Size時可以再下啲工夫，譬如揀一啲手掌大啲啲嘅嫩魚，相信味道一定唔會好似一啲老魚咁，食盡人間煙『火』！」
我都係為咗呢味本地海膽而嚟呢度食，一般日本料理店真係好難食到；入口海水味極濃，試過就咁將一茶匙本地海膽放入口，感覺滿口鮮甜甘香，一般入口貨無呢種感覺！
比加拿大海膽濃味幾倍
小馬哥話：香港所出嘅海膽出名細隻兼少肉，拆開一隻本地海膽大概只可以攞到手指頭咁多肉，所以好多舖頭都嫌麻煩而選用入口貨……不過論味道，本地海膽始終好啲，由於佢擁有其他海膽無嘅膽汁，入口特別濃！
小記話：聽到口水滴晒落枱，二話不說即刻行動……入口時分辨唔出邊啲係飯同海膽，因為海膽汁已經完全滲入飯粒內，可以大膽講句，即使係飯粒都要比加拿大海膽鮮甜幾倍。
肉質較養魚細密
小馬哥話：香港市面有啲日本料理，為咗慳成本而用養魚做刺身。食出方法好簡單，養魚做刺身，肉質較鬆散，食落會有一種霉霉哋嘅感覺；用肉眼都可以分辨得出，由於海魚成日需要四出覓食，唔似養尊處優嘅養魚，所以肉質纖維比較細密，因此做刺身時可以切得好薄好薄。
小記話：真係可以薄到用筷子夾起時透光！認真厲害，現在可以自捉魚做刺身的包括赤鱲、黃腳鱲、細鱗、懵仔同石蚌等，不過出海打魚嘅嘢，當然要睇每次嘅魚穫啦！
牛油果香夾蝦肉鮮
小記話：呢款綠精靈壽司做法可謂極盡心思，將牛油果細切成薄薄的一片片，在壽司面砌出有如魚鱗嘅細緻圖案，然後在壽司卷內，放入蟹柳、蟹子、天婦羅鮮蝦等，入口時先感受牛油果喺外層嘅清新潤滑感覺，再𡁻落係天婦羅蝦嘅香脆及鮮嫩肉感，簡直喺你脷底下不斷鑽出幾種不同感覺，口感非常有層次感！
地址：九龍城福佬村道5-9號地下D舖
電話：23823219