中國入世（WTO），唔少人嘅目光都投放響國內市場以拓展商機，其中汽車入口需求預期亦會有大幅增長；最近亞Mark就跟光岡（Mitsuoka）香港代理嘅MichaelLam傾開，至今重有唔少人以為佢哋係改裝汽車嘅入口商，查實Mitsuoka係位列日本汽車生產商之一，只因佢哋生產嘅汽車型號，大多係量產HandMake型號關係，因而畀人有咁大嘅謬誤囉！雖然近排本地汽車市場疲弱，之不過Michael卻笑容滿面噃！細問之下，原來佢哋恒昌汽車，最近重取得Mitsuoka響全中國嘅代理權，遲吓SARS降溫的話，佢哋重會搞個大型發布會㖭！至於亞Mark嘅着眼點，自然會係光岡快將面世嘅Orochi超級跑車啦！聽聞新車會於稍後時間嘅東京車展中亮相，並會以一台3.5公升V6偈（馬力280匹）作骨幹，暫定產量不過30部咋！據知右軚版嘅Orochi定價會係港幣百萬元以上，單喺外形看來，呢部尺碼4580×2050×1410mm嘅Orochi，經已教人眼前一亮呢！