雖然近期中國及香港，都同時受到非典型肺炎疫症嘅影響，而令社會各方都大受打擊，但卻未能阻嚇一班來自中港台嘅賽車發燒友，來到珠海賽車場參加本年度首個大型賽事活動，就連大家熟識嘅台灣歌手林志穎，亦到場參加康巴斯方程式賽事㖭！不如今日就由我哋嘅特約記者，帶大家到珠海賽車場，睇吓當日嘅盛況啦！
特約記者、攝影：利廣源
造成今次賽事非常熱鬧嘅原因，除因為係2003年首次舉行嘅大賽外，同時亦由於珠海賽車場得到新嘅注資，整體設施都有所改善，特別係爭取到一個贊助商支持今次比賽，獎品豐富嘅大抽獎更吸引到唔少現場觀眾；同時，兩日共安排咗多達十一場賽事，包括有三場電單車賽、四場方程式賽、兩場房車賽、一場迷你車賽及一場珍藏車賽，絕對稱得上係應有盡有，難怪唔少在場車迷都大叫大飽眼福啦！
此外，今次參賽嘅車手陣容亦非常鼎盛，電單車賽有剛剛喺日本跑完世界賽嘅張煒安、方程式賽事中有女車手鄧穎詩，以及車神盲亨之子詹家圖，連一向熱衷賽車嘅台灣著名歌手林志穎都不怕肺炎，專誠來到珠海賽車場參加康巴斯方程式賽事。至於房車賽方面，最受注目當然係三級方程式車手李英健，駕駛標緻306力戰本田CivicTypeR（EP3）及IntegraTypeR（DC5）兩款新戰車，另外重有一批1600cc車手，為爭奪今年澳門格蘭披治50周年紀念大賽嘅參賽權而戰，因而令全日嘅賽事變得戲碼十足。
先講講2003年度香港房車錦標賽，喺超級生產車賽事中，香港最成功嘅方程式車手李英健首次參加房車賽；其實Marchy（李之暱稱）以往亦有以玩票性質，參加於珠海舉行嘅房車耐力賽，但真正加入房車賽則係從今次開始。佢嘅車隊得到國內某大保險集團贊助，使用曾經在亞洲房車賽中，得到總冠軍嘅標緻306作為戰車，隊友重有房車賽中經驗豐富嘅陳學德及陸淦；不過，佢嘅對手亦非等閒之輩，計有盧雄彪、盧家駿及盧家輝三父子，駕駛本田CivicTypeR（EP3）嘅潘德俊、重有駕駛本田IntegraTypeR（DC2）嘅蘇華龍同秦國興等等，佢哋都曾經喺亞洲房車賽及澳門東望洋大賽中上陣。Marchy喺賽事中排頭位起步，雖然一開始時失利，並曾一度跌落第三位；但Marchy實力非凡，喺十二圈賽事中有耐性地追回失地，結果以23分00.844秒率先衝過終點，而駕駛本田CivicTypeR（EP3）嘅潘德俊，則以9.629秒之差屈居亞軍，而季軍得主係以本田IntegraTypeR（DC5）出賽嘅盧家駿。
其他賽事方面，中國車手程叢夫可算係最威風，連贏亞洲雷諾方程式挑戰賽首兩回合賽事；程叢夫係上屆中國雷諾方程式賽事總冠軍，係中國幾位優秀新進賽車好手之一。而台灣著名歌手林志穎，於今次比賽可算係盡興而回，喺兩個回合嘅康巴斯方程式中得到兩次亞軍，分別只敗於詹家圖同李卓峰，但呢兩位車手都只能各勝一場，喺另一場賽事中，都因為壞車而未能跑畢全程。另外，張煒安響電單車賽事亦出師不利，未能打入三甲位置。至於香港房車錦標賽1600ccA組賽事，香港車手簡英強以一部本田Civic（EG6）獲得冠軍，鄧銘康及唐國遠則分別奪得亞軍及季軍；B組賽事方面，同樣以本田Civic（EK4）參戰嘅鄧健威及梁永強，分別奪得冠軍及亞軍，而駕駛本田Civic（EG6）嘅鄭健文，則獲得季軍。
今場比賽亦開始咗2003年珠海賽車嘅日程，此後每個月都會有房車賽同埋方程式比賽；而11月嘅澳門格蘭披治大賽車50周年賽事，則會係今年本地賽車嘅高潮所在。
趁住今次賽車活動，本港著名車手李英健，亦喺珠海賽車場上正式開設其個人嘅賽車學校，而名稱則為MarchyRacingDevelopment（MRD）；MRD成立嘅目的，係由Marchy（李之暱稱）把專業賽車技術，帶畀所有車手同賽車愛好者，更為車手提供支援，參加於亞洲區舉辦嘅多項賽事，當中包括亞洲三級方程式，同埋亞洲雷諾方程式等比賽。
然而，MRD亦會為車手提供方程式賽車嘅專業技術及知識，而且都有房車賽嘅指導課程，所採用嘅車輛更係全新嘅本田IntegraTypeR（DC5）；此外，MRD亦會提供賽車寄存、維修及保養服務，兼且重有賽車出租，而其VertexMotorsports車隊，則會響Marchy親自參與下，參加三級方程式和雷諾方程式等賽事㗎！