方力申近日接咗雀巢新系列「冰極檸檬茶」廣告，佢重跟咗拍攝大隊去咗馬來西亞開工，呢次方力申除咗係香港區代言人外，重係台灣、大馬、越南同泰國嘅代言人，都咪話唔威水。
廣告商為咗要拍攝出「冰封」嘅感覺，佢要方力申做出一個好誇張嘅表情，結果方力申用心演繹，最終好順利咁一take就OK。廣告商又喺大馬借用消防車，拍攝一幕向方力申射水嘅場面，有飛魚王子美譽嘅方力申一連俾水射足六粒鐘都頂得住。方力申又不停喺借用嘅火車站影相留念。
由於攝製隊都係荷李活班底，廣告商安排大家一日可以食五餐，方力申重因為咁樣有增磅，幸好拍攝時都有動作部份，所以方力申好快就瘦番。
此外，廣告中方力申重同一位樣貌似畢彼特嘅外籍演員合作，佢哋因為年紀都差唔多，兩位年輕人埋位前後都雞啄唔斷。方力申覺得難得機會識多位朋友，佢都好珍惜大家嘅友誼。
闊別香港多時嘅女歌手蕭瀟，噚日接受電台訪問，冇見蕭瀟咁耐，原來佢去咗台灣，重發展得唔錯㖭，佢話：「其實我媽咪爹哋都喺香港，我三個月都會返嚟一次。」問到佢香港同台灣有乜分別，佢就話：「喺香港嘅時候係矇查查咁入行，怯場之餘又唔敢面對觀眾，唔知自己做緊乜。去到台灣接觸咗好多嘢，𠵱家清楚知道自己喺歌唱事業上要啲乜，冇咁多疑問。」
琦琦噚日去咗金鐘太古廣場嘅唱片舖，搜刮饒舌歌手Eminem嘅唱片，琦琦話：「𠵱家香港氣氛咁差，人人都唔開心，政府啲應變又咁慢，一定要聽啲好似Eminem咁勁揪嘅音樂去發洩吓對政府嘅憤怒，不過我覺得香港人咁堅強，呢一關香港一定捱過嘅。」
陳奕迅噚日喺台灣舉行「黑白灰唱片發布會」，佢喺發布會上自彈自唱，又唱又跳。舊年陳奕迅喺台上滑倒，撞傷下體，噚日正是一周年「紀念日」，佢話：「今晚我會去食荔枝，以形補形，其實破蛋對我嘅心理同生理都有影響，因為怕屋企人擔心，所以我工作時候就少咗跳跳紮。」
文頌嫻噚日以嘉賓身份上咗無綫節目《都市閒情》度教人煮餸，前晚佢細佬突然發燒，搞到成家都大為緊張，個個都以為佢細佬患上非典型肺炎，好彩朝早起身細佬已經退燒，屋企人先冇咁擔心，不過佢過幾日要返大陸剪綵，佢到𠵱家都唔敢話畀屋企人知，話驚屋企人擔心。
