港股噚日跟隨美股上升，不過升幅有限，恒指收報8632，升98點，成交59.76億元。
阿虎噚日見到高盛在恒指8600以上對銀行股狂沽猛打，主要沽售對象仍是恒生銀行（011），但恒生仍有1.3%升幅，收報76.50元，成交3.1億元。瑞銀華寶前日與高盛及大摩對着幹，大手承接恒生，噚日買盤收斂，改由中銀證券接貨。據聞唔少散戶貪恒生高息，入市接咗唔少貨，以恒生噚日收市價計，股息率達7厘，相當吸引。不過，恒生冇保證每年都會派高息，散戶會唔會一廂情願呢？
講起瑞銀，原來佢哋亦出咗份報告睇淡恒生，調低今年盈利預測10%至93.34億元，而且估計新增不履約貸款撥備預測，由減少4%改為增加25%，反映SARS令本地樓價下跌及失業率上升的影響，更將目標價由94元降至84元，投資評級由「買入」降至「中性」。不過，阿虎噚日重未見瑞銀掉頭沽恒生。
東航（670）噚日未正式開市，股價已被Mark高20%，有逾500萬股以每股1元成交，市場隨即四圍搵原因。黑客話，有消息指國泰（293）入股東航嘅商討有進展，可能因為呢個消息刺激股價上升。正式開市後，股價升幅收窄，收市報0.89元，升6%，成交4958萬元。
德發（928）曾於3月6日發表聲明，指裕元（551）入股德發之報道不確，但其後於本周一又話已經訂立意向，擬向裕元授出購股權，畀裕元認購20%德發股權。其實前後只相隔1個月多啲，睇嚟洽商進度認真快。
阿虎3月6日睇完德發個通告，初時重以為裕元入股傳聞係流料，點知原來係堅料，若阿虎相信傳聞，趁低在0.53元吸納，噚日已經賺逾10%利潤。
阿虎