鍾太個女肥肥好黐身，連做家務時都要陪佢玩，實在頭痕！終於俾佢諗到條好橋，原來小朋友做家務可以當玩，家務玩具一樣有齊掃地洗碗熨衫的小工具，可以一邊做家務一邊同個女玩遊戲，睇吓邊個做得最快最妥當。自小培養佢收拾清潔屋企好習慣，一舉幾得！
記者：招佩珊 攝影：陳陶鈞
ImageMom&Kid：鍾太、肥肥、偉軒
當我忙到踢晒腳，又抹地又煮飯嘅時候，肥肥又嚷着陪佢玩積木，好在今次我有備而來，一開始就拎套清潔玩具出嚟，係完全啱晒小朋友尺寸的縮細版，同肥肥講：「不如我哋用呢套新玩具玩遊戲！」貪玩嘅肥肥一聽到，非常雀躍。接下來一個鐘，我有我一邊做家務，肥肥就喺旁邊跟住一齊做，唔會阻住我，又可從中教佢點做家務，點做才安全又乾淨。
我話同肥肥比賽清潔屋企，旁邊得三歲嘅細佬偉軒又話要玩，就睇吓邊個洗廁所洗得最乾淨、摺衫摺得最整齊，就得到波板糖一大支做獎勵，兩個一聽到有大獎，已急不及待穿上膠手套拿起玩具刷衝入廁所！究竟比賽結果係點？
家務大賽
對小朋友來說，用漂白水洗廁所抹地板，實在太危險啦！我當然唔會畀佢兩個用化學品，所以就同肥肥講，先由我示範一次點樣洗廁所，然後就輪到佢，而我就趁住呢個「示範」時間，乘機完成真正洗廁所的重要任務。「示範」完畢，廁所又洗得乾乾淨淨，就輪到肥肥出場，雖然佢只係用細細件嘅玩具廁所刷同清潔劑，但姿勢學到足，刷得好落力，今個回合，我就畀佢贏啦！
洗完廁所，就去廚房，我只欠爐頭上一點污迹還未清潔，就讓肥肥幫手，加點水喺佢個迷你刷同海綿上，不消一會便將污迹擦去，肥肥贏了兩個回合啦！
熨衫、吸塵呢類高難度家務小孩當然做唔到，不過，好似吸塵咁，肥肥見我推一下，佢就推住部小吸塵機有樣學樣。我熨衫，佢又揸住個玩具熨斗OneMoreTwoMore出力推，就當做運動強身健體。熨衫就要我出手，不過摺衫細妹就搞到一塌糊塗，摺到一嚿嚿唔合格，最終都係由我執手尾。
見到肥肥做得咁開心，又連贏我幾個回合，偉軒又嚷着要大顯身手，佢嘅專長就係掃地，一見到地上有嚿大垃圾便拎起掃帚動手，眼界相當準，可以將垃圾全部掃到迷你垃圾鏟上，其實呢項家務亦最適合小朋友，運動量相當大，幫到手之餘更可以強身健體。
玩煮飯仔有真實感
還有其他迷你版廚具，雖則玩味程度較高，但至少可以讓小朋友認識到各類廚具的用途，又可以齊齊玩煮飯仔，不過，講到最過癮就要數鋅盆，只要入電池注入水，鈕開水龍頭就會有水流出，像真度十足，係時候訓練小朋友幫手洗碗！
修理水喉上螺絲呢類家務，小朋友當然應付唔到，不過，呢套工具就可以訓練到小朋友手指的靈活性，而砌積木時又可以動腦筋鍛煉思考能力。
店舖資料
（a） 玩具反斗城
地址：尖沙嘴海運大廈地庫032
電話：27309462
（b） 親親小寶教育玩具專門店
地址：旺角彌敦道700號工業貿易署大樓地下11號舖
電話：23925068