值得香港人自豪的，實在有很多。單是吃，我們有曾獲選全球十大食肆的「鏞記酒家」，燒鵝馳名國際。植根香港六十年，經歷過霍亂疫症、六七暴動與八七股災，近年又有金融風暴與禽流感，也算幾經風雨，鏞記老闆甘健成公開他的成功秘訣：「Keep住班夥計安安樂樂，有信心就會落力做嘢，逆境都會易守啲。」
從電視新聞中看過這樣的片段，有打工仔被要求每天到政府診所檢查身體，他就怒氣沖沖說，很擔心因此被公司炒魷魚。甘老闆覺得，食肆逆市經營，一定要消除同事這些顧慮，「以前在街上好多人笑，現在真係少了笑容，客人入嚟食嘢，都想食得開開心心。如果夥計成日擔心減人減薪，連信心都失埋，又點可以好好招呼客人，所以最緊要安撫夥計。
「勞資關係好重要的，淨係得老闆，無一班好拍檔，就永遠都做唔到好成績。清潔做得乾淨企理，客人先至有信心，傳菜又第一時間上菜給客人，每個職位都咁重要。」
「夥計」是鏞記的資產之一，最近就起了作用，甘老闆說：「夥計有空時，會打電話畀自己的熟客，關心吓對方，傾傾吓就會幫襯，全靠班夥計，努力拉多啲客啦。呢個時候大家都流血了，只係睇吓邊個流少啲血啫。」
自從戴上口罩後，鏞記式熱情笑容就看不見了，但甘老闆有妙方，他笑得燦爛地說：「家陣睇唔到笑容，拉門、點頭等動作要大啲，講多謝又會大聲啲，第一日戴口罩就教他們了！」
記者、攝影：李敬賢