前些時本欄寫「水靜河飛」、「水盡鵝飛」、「水淨鵝飛」之辯，引來不少讀者意見，已經解決咗「水靜河飛」乃係誤解。想唔到中華書局總經理陳國輝先生係本欄每日讀者，佢唔抵得左丁山識字少，送咗中華書局喺一九九八年出版嘅兩本書嚟，分別係《論粵方言詞本字考釋》（作者陳伯煇博士，澳門理工學院語言及繙譯高等學校副校長）及《生活粵語本字趣談》（作者陳伯煇、吳偉雄）。左丁山收到，當然立即睇吓。前者係陳博士嘅暨南大學博士論文，學術氣味濃厚，後者較為輕鬆，適合一般人。
開卷永遠有益。我哋成日講「畀份《蘋果》我，畀咗錢未？」呢個「畀」字原來源遠流長，陳博士話「畀」，最早見於《書經》。《書．洪範》：「帝乃震怒，不畀洪範九疇。」，《詩經．小雅》巷伯：「投畀豺虎。」畀，與也，可見廣東話歷史幾咁長，現代普通話以「給」代「畀」，其實冇咁古雅。
「冚辦爛」走開。「冚辦爛」其實係「咸不剌」；「溝女」個「溝」字應該係勼，上古時代已有，係「聚」嘅意思，有幾種異體，《左傳》作「鳩」，《古文尚書》作「逑」，《莊子》作「九」，由聚集嘅意思，引伸為混和，再引伸為追求。「勼」本應讀geu，與篝、溝、勾、鈎、鳩等字同音，因忌諱而轉讀keu。
陳博士、吳先生兩人對廣東話逐隻字研究，讀完本書都覺得自己有學問。用廣東話寫文，其實不求甚解，唔識來龍去脈。呢兩本書話畀你聽粵語方言源遠流長，千祈唔好誤會為粗鄙之詞。